قومی کرکٹ ٹیم کے کپتان بابراعظم کی ہارورڈ بزنس اسکول میں اپنے ہم جماعتوں کے ساتھ شیئر کی گئی تصویر سوشل میڈیا پر وائرل ہوگئی۔

سماجی رابطے کی ویب سائٹ ٹوئٹر پر قومی کرکٹ ٹیم کے کپتان بابراعظم نے ایک تصویر شیئر کی جس میں وہ ہارورڈ بزنس اسکول میں اپنے کلاس فیلوز کے ساتھ دکھائی دے رہے ہیں۔

کلاس میں بابر اعظم اپنے ساتھیوں کے ساتھ خیالات کا اظہار کرتے نظر آرہے ہیں، جس میں ان کی کلاس کے دیگر دوست بھی موجود ہیں، کپتان نے تصویر کے کیپشن میں لکھا کہ ’’دنیا کو بدلنے کے لئے تیار کچھ سوچ رکھنے والے پرعزم لوگوں سے ملاقات‘‘۔

 بابراعظم کے ہمراہ کلاس میں سابق ہیوی ویٹ چیمپیئن فرانسس نگانو اور چیلسی فٹبال کلب کے کپتان سیزر ازپیلیکوٹا بھی ان کے ہم جماعت ہیں۔

گزشتہ دنوں کپتان بابراعظم اور محمد رضوان نے ایک تصویر شیئر کرتے ہوئے بتایا تھا کہ ہارورڈ بزنس اسکول کے ایگزیکٹو ایجوکیشن پروگرام میں داخلہ لیا ہے، جو نہ صرف ان کی ترقی بلکہ مجموعی طور پر کرکٹ کمیونٹی کے لیے بھی ایک اہم سنگ میل ہوگا۔

 پروگرام میں شرکت کے لئے دونوں کرکٹرز 31 مئی سے 3 جون تک امریکی ریاست بوسٹن میں ہارورڈ بزنس اسکول کیمپس کی کلاسز میں شریک تھے، جہاں انہوں نے بزنس آف انٹرٹینمنٹ، میڈیا اور اسپورٹس پر مبنی کورسز کیے۔