اسٹار آل راؤنڈر محمد حفیظ کا کہنا ہے کیویز کی طرف سے اچھے آغاز کے باوجود بولرز نے کم بیک کرتے ہوئے فتح کا راستہ بنایا۔

ابوظبی میں کھیلے جانے والے پہلے ٹی ٹونٹی میچ میں کامیابی کے بعد میڈیا سے گفتگو کرتے ہوئے محمد حفیظ نے کہا کہ نوجوان کرکٹرز میں بڑی توانائی اور جذبہ ہے، مشکل صورتحال اور دباؤ سے گھبراتے نہیں بلکہ اپنی صلاحیتیں منوانے کی کوشش کرتے ہیں، مضبوط حریفوں کے ساتھ سخت مقابلوں میں انہیں مزید سیکھنے اور اعتماد حاصل کرنے کا موقع ملے گا۔

محمد حفیظ نے کہا کہ نوجوان کرکٹرز کا حوصلہ جوان رکھنے کی کوشش کرتا ہوں، سب سے کہتا ہوں کہ کسی بھی صورتحال میں دل میں جو پلان ہو اس پر پورے یقین اور عزم کے ساتھ عمل کرو۔ شاہین آفریدی آخری اوور کر رہے تھے تو ان کو بھی یہی کہا کہ جہاں چاہتے ہو بال کرو مگر کسی بے یقینی کیفیت کا شکار مت ہونا، حسن علی اچھا تجربہ حاصل کر چکے ہیں۔