پاکستان بھارت سیریز ہرجانہ کیس میں آئی سی سی نے قانونی اخراجات کی ادائیگی پر بھی بھارت کے حق میں فیصلہ دے دیا۔

انٹرنیشنل کرکٹ کونسل نے پاکستان کرکٹ بورڈ کو کیس پر اٹھنے والے اخراجات کا 60 فی صد ادا کرنے کی ہدایت کی ہے، بھارتی کرکٹ بورڈ نے پی سی بی سے 15 کروڑ اخراجات کی مد میں ادا کرنے کا مطالبہ کیا تھا۔

اس فیصلے پر پی سی بی کا موقف بھی سامنے آیا ہے جس میں کرکٹ بورڈ نے آئی سی سی کے فیصلے پر کہا ہے کہ یہ ہمارے اس موقف کی تائید ہے کہ پی سی بی کا کیس میرٹ پر تھا تاہم اس تنازع کے حل کے لیے بنائی گئی آئی سی سی کی ڈسپیوٹ کمیٹی کا فیصلہ مایوس کن تھا۔

دریں اثنا آئی سی سی نے اپنے فیصلے میں اس کیس پراٹھنے والے تمام انتظامی اخراجات بھی پی سی بی کو ادا کرنے کا حکم دیا ہے۔

یاد رہے کہ پی سی بی کے سابق سربراہ نجم سیٹھی نے اس کیس پر موقف اختیار کیا تھا کہ ان کا بھارتی بورڈ پر 70  ملین ڈالرز ہرجانے کا کیس بہت مضبوط ہے اور اس کے لئے پی سی بی نے ملکی اور غیرملکی وکلا پر مشتمل ٹیم کو کروڑوں روپے فیس ادا کی تھی، گورننگ بورڈ سے اس کیس کے لیے 10 کروڑ سے زیادہ کا بجٹ منظور کروایا تھا ۔