سری لنکن آل رائونڈر اُن 10 کھلاڑیوں میں شامل تھے جنہوں نے سیکورٹی وجوہات کی بنا پر پاکستان کا دورہ کرنے سے انکار کیا تھا۔
تھیسارا پریرا نے سوشل میڈیا پر لب کشائی کرتے ہوئے پاکستان کا دورہ نہ کرنے کی اصل وجہ بتادی۔

سری لنکن کرکٹ بورڈ نے سیکورٹی وجوہات کی بنا پر پاکستان کا دورہ کرنے سے انکار کرنے والے 10 کھلاڑیوں کی فہرست جاری کی تھی جن میں تھیسارا پریرا کا نام بھی شامل تھا۔ جبکہ آل رائونڈر پریرا 2017 میں پاکستانی شہر لاہور میں ہونے والے ٹی 20 انٹرنیشنل میں پاکستان کے خلاف کھیل چکے تھے۔

   
سوشل میڈیا پر کیریبیئن لیگ کھیلنے کے حوالے سے ایک پرستار نے جب ان پر تنقید کی تو جواب میں انہوں نے وضاحت دیتے ہوئے کہا کہ جب وہ کیریبیئن میں تھے تو انہیں ڈینگی ہوگیا جس کی وجہ سے ان کے لیے کسی بھی قسم کے میچ میں کھیلنا ممکن نہ رہا۔ وہ اپنے ڈاکٹر کی ہدایت کے مطابق اس وقت بھی بیڈ ریسٹ پر ہیں۔ ان کا کہنا تھا کہ لوگ حقائق کو جانے بغیر کچھ بھی کہہ دیتے ہیں۔

   
دوسری جانب سری لنکن کرکٹ بورڈ کی جانب سے واپس بلائے جانے سے قبل پریرا سی پی ایل کے چار میچ کھیل چکے تھے۔ پریرا سمیت سی پی ایل کھیلنے والے تمام کھلاڑیوں کو سری لنکن حکام نے پاکستان کے دورے کی تیاری کے لیے لگائے گئے کیمپ میں شرکت کے لیے واپس بلایا تھا تاہم تھیسارا پریرا حالیہ ون ڈے اور ٹی 20 سیریز کھیلنے کے لیے پاکستان نہیں آئے۔