پاکستان کے دورے پر کراچی میں موجود سری لنکن کرکٹ ٹیم کے کپتان نے سوشل میڈیا پر اپنی ایک ویڈیو جاری کی ہے جس میں وہ چائے کا کپ ہاتھ میں تھامے اپنے پرستاروں سے مخاطب ہیں۔ انہوں نے پاکستان کے دورے پر خوشی کا اظہار کرتے ہوئے کہا ہے کہ پاکستان میں کرکٹ کھیلنا ان کے لیے بے حد خوشی کی بات ہے۔ انہوں نے پاکستان کے لیے نیک خواہشات کا اظہار کیا اور کہا کہ ہم آپ کو یہ بتانا چاہتے ہیں ہم سری لنکا کی چائے کی طرح اچھے ہیں۔ 

9 سیکنڈ کی یہ ویڈیو سوشل میڈیا پر وائرل ہوگئی ہے۔ جس پر پاکستان سے اور دنیا بھر سے لوگوں نے ردِ عمل ظاہر کرتے ہوئے پاکستان اور سری لنکا کے درمیان ہونے والی کرکٹ سیریز کی کامیابی کے لیے نیک تمنائوں کا اظہار کیا ہے۔

رواں برس کے شروع میں پاکستانی حدود میں گرفتار ہونے والے بھارتی فضائیہ کے پائلٹ ابھینندن کی ایک ویڈیو بھی سوشل میڈیا پر وائرل ہوئی تھی جس میں وہ چائے کا کپ ہاتھ میں تھامے چائے اور پاکستانی  حکام کی تعریف کرتے نظر آئے تھے۔ 
 

پاکستانی مداحوں نے سری لنکن کپتان کی ویڈیو کو بھارتی پائلٹ کی ویڈیو سے جوڑتے ہوئے اس پر اپنے انداز میں تبصرے کیے ہیں۔  

دوسری جانب پاکستان میں چار سال کے بعد کوئی غیرملکی ٹیم کرکٹ کھیلنے کے لیے آئی ہے۔ پاکستان اور سری لنکا کے درمیان تین ون ڈے اور تین ٹی 20 میچ کھیلے جائیں گے۔