ورلڈکپ شیڈول کا اعلان: بی سی سی آئی نے اہم میٹنگ بلالی

ورلڈ کپ کی تیاریوں کے سلسلے میں بھارتی کرکٹ بورڈ (بی سی سی آئی) نے 27 مئی کو گجرات کے اہم شہر احمدآباد میں اسپیشل جنرل میٹنگ (ایس جی ایم) بلالی۔

بھارتی میڈیا کی رپورٹس کے مطابق بورڈ کی جانب سے بلائی جانے والی اسپیشل میٹنگ کا مقصد آئی سی سی ورلڈکپ 2023 کی تیاریوں اور وینیوز کے حوالے سے حتمی پلان کو مرتب کیا جانا ہے۔

آئی سی سی کی جانب سے اب تک ورلڈکپ 2023 کے شیڈول کا اعلان نہیں کیا گیا ہے تاہم رپورٹس میں دعویٰ کیا گیا تھا کہ 5 اکتوبر سے 19 نومبر تک کھیلے جانے والے میگا ایونٹ کے لیے 12 وینیوز کا انتخاب کیا گیا ہے جبکہ فائنل احمد آباد کے نریندر مودی کرکٹ اسٹیڈیم میں کھیلا جائے گا۔

دوسری جانب آئی پی ایل میں شرکت کے باعث غیر ملکی کھلاڑی آئی سی سی ورلڈ ٹیسٹ چیمپئین شپ کے لئے تین الگ الگ پروازوں کے ذریعے انگلینڈ روانہ ہوں گے، پہلا دستہ 23 سے 24 مئی جبکہ آخری دستہ 30 مئی کو انگلینڈ پہنچے گا۔

واضح رہے کہ ورلڈکپ ٹیسٹ چیمپیئن شپ کا فائنل 7 سے 12 جون تک بھارت اور آسٹریلیا کے درمیان کھیلا جائے گا۔