حیدرآباد میں کھیلے گئے پانچ میچوں کی سیریز کے پہلے ٹیسٹ میچ میں انگلینڈ نے بھارت کو شکست دے دی۔
تفصیلات کے مطابق حیدرآباد ٹیسٹ کے چوتھے دن 231 رنز کے ہدف کے تعاقب میں میزبان بھارتی ٹیم 202 رنز بنا کر آؤٹ ہو گئی یوں انگلینڈ 190 رنز کے خسارے کے باوجود 28 رنز سے یہ ٹیسٹ میچ جیت گیا۔
انگلش اسپنر ٹام ہارٹلی نے دوسری اننگز میں شاندار بولنگ کا مظاہرہ کرتے ہوئے 26.2 اوورز میں 62 رنز دے کربھارتی ٹیم کی 7 وکٹیں حاصل کیں۔
دوسری اننگز میں ہدف کے تعاقب میں بھارتی بلے باز بری طرح ناکام ثابت ہوئے، کپتان روہت شرما سات چوکوں کی مدد سے 39 رنز بناکر ٹاپ اسکورر رہے۔
اس سے قبل انگلینڈ کی ٹیم پہلی اننگز میں 246 رنز پر آل آؤٹ ہوگئی تھی جس کے جواب میں بھارت نے اپنی پہلی اننگز میں 436 رنز بنائے تھے۔
انگلینڈ نے اپنی دوسری اننگز میں اولی پوپ کی 196 رنز کی شاندار اننگز کی بدولت 420 رنز بنائے اور 190 رنز کے خسارے کے ساتھ بھارت کو جیت کیلئے 231 رنز کا ہدف دیا تاہم بھارت کی پوری ٹیم اپنی دوسری اننگز میں 202 رنز پر ڈھیر ہوگئی۔
بھارت اور انگلینڈ کے درمیان سیریز کا دوسرا ٹیسٹ میچ 2 فروری سے وشاکھاپٹنم میں کھیلا جائے گا۔