قومی کرکٹرعثمان قادر کا کہنا ہے کہ ٹیم سے ڈراپ ہونے کے بعد ہمیشہ کیمپ میں آنے کی امید رہتی ہے۔ انہوں نے کہا کہ قومی ٹیم سے ڈراپ کیوں کیا گیا اس بارے میں مجھے کچھ علم نہیں، یہ تو وہی بتا سکتے ہیں جنہوں نے مجھے ڈراپ کرنے کا فیصلہ کیا.

لاہورمیں میڈیا سے بات چیت کرتے ہوئےعثمان قادرکا کہنا تھا کہ بدقسمتی ہے مجھے اسپنرز کے کیمپ میں نہیں بلایا گیا، میرا فٹنس کا کوئی مسئلہ نہیں، یہ نہیں بتا سکتا کہ کیمپ میں کیوں نہیں تھا ۔

کرکٹر کا کہنا تھا کہ مجھے ٹیم سے ڈراپ کرنے کے بارے میں وہی بتا سکتے ہیں جنہوں نے یہ فیصلہ کیا، میرا مورال بلند ہے کیونکہ میں ہمیشہ مثبت سوچتا ہوں۔ 

عثمان قادر کے مطابق مجھے پہلے رنز کرنا اور وکٹیں لینا ہیں اس کے بعد بیان بازی کر سکتا ہوں،  ڈومیسٹک یا لیگز میں رنز اور وکٹیں لے کر میں کم بیک کر سکتا ہوں، میں سیکھنے کی مزید کوشش کروں گا اور ٹیم میں واپس آؤں گا۔

انھوں نے مزید کہا کہ  شاداب خان اور اسامہ میر کے لیے نیک خواہشات ہیں، میں بھی اپنا مقام آل راؤنڈرز میں بنانا چاہتا ہوں ۔

دوسری جانب پاکستانی کرکٹ ٹیم کے دورۂ سری لنکا کے شیڈول کا اعلان کردیا گیا ہے۔ دو ٹیسٹ میچز کی سیریز گال اور کولمبو میں کھیلی جائے گی جب کہ ٹیم دو روزہ وارم اپ میچ بھی کھیلے گی۔

پہلا ٹیسٹ گال انٹرنیشنل اسٹیڈیم میں 16 سے 20 جولائی تک کھیلا جائے گا۔

پاکستانی اسکواڈ میں شامل کھلاڑی:

پاکستانی ٹیم جن کھلاڑیوں پر مشتمل ہے ان میں بابراعظم ( کپتان )، محمد رضوان ( وکٹ کیپر اور نائب کپتان ) عامر جمال، عبداللہ شفیق، ابرار احمد، حسن علی، امام الحق، محمد حریرہ، محمد نواز، نسیم شاہ، نعمان علی، سلمان علی آغا، سرفراز احمد، سعود شکیل، شاہین آفریدی اور شان مسعود شامل ہیں۔