پاکستان سپر لیگ (پی ایس ایل) کے سیزن 9 کے لیے ڈرافٹ کی تقریب کا باضابطہ آغاز ہوگیا، تمام فرنچائزز کے مالکان کوچز اور مینٹوز کے ہمراہ نیشنل کرکٹ اکیڈمی لاہور پہنچ گئے۔
آج ہونے والی ڈرافٹ کی تقریب میں فرنچائزز اپنا اپنا پلینئگ اسکواڈ مکمل کریں گی، لاہور قلندرز نے پلاٹینم پلیئر فخرزمان کو جبکہ کوئٹہ گلیڈی ایٹرز نے ڈائمنڈ کیٹیگری میں شامل محمد نواز کو ریلیز کردیا تھا، کراچی کنگز نے محمد عامر، حیدر علی، شرجیل خان اور قاسم اکرم کی خدمات دوبارہ حاصل نہیں کیں۔
دوسری جانب اسلام آباد یونائیٹڈ نے آصف علی اور ملتان سلطانز نے شاہنواز دھانی کو ریلیز کردیا تھا،ان کے ساتھ دیگر ملکی کرکٹرز بھی ڈرافٹ میں فرنچائزز کی توجہ پانے کے منتظر ہوں گے، مجموعی طور پر 22 ملکوں سے تعلق رکھنے والے 485 غیر ملکی کرکٹرز نے بھی رجسٹریشن کرائی ہے،ان میں 46 پلاٹینم اور 76 ڈائمنڈ کیٹیگری میں شامل ہیں۔
نمایاں پلاٹینم پلیئرز میں ایشٹن اگار، ڈینیل سامس، مجیب الرحمان، نور احمد، رحمان اللہ گرباز، فضل الحق فاروقی، بین ڈکٹ، کرس جارڈن، ڈیوڈ ویلی، ڈیوڈ مالان، لیوک ووڈ، ریس ٹوپلے، ٹام کرن، ٹائمل ملز، سندیپ لامی چینے، جمی نیشم، راسی وین ڈر ڈوسین، عمران طاہر، مہیش تھیکشانا، بھانوکا راجا پکسا، ڈاسن شناکا،اینجیلو میتھیوز، ایون لوئس، کیرون پولارڈ، آندرے فلیچر،کارلوس بریتھ ویٹ، رومین پاول، روماریو شیفرڈ،برینڈن کنگ اور کائل میئرز کے نام موجود ہیں۔
ڈائمنڈ کیٹیگری میں ایڈم لیتھ، عظمت اللہ عمرزئی، چاڈ بویس، چیڈوک والٹن، کرس گرین، ڈین لارنس، چمیکا کرونارتنے، چارتھ اسالنکا، دلشان مدوشنکا، دشمانتھا چمیرا، سدیرا سمارا وکرما، جارڈن کاکس، فابین ایلن، لیام ڈاسن، لٹن داس، میکس اوڈوڈ، مہدی حسن میراز،محموداللہ، اولی پاپ، اوشین تھامس، روسٹن چیس، شائی ہوپ، شمارا بروکس، تمیم اقبال، وائن پارنیل اور ظاہر خان شامل ہیں۔