پاکستان کے جونیئر چیف سلیکٹر سہیل تنویر امریکی لیگ کرکٹ کھیلنے لگے جب کہ پی سی بی کے مطابق وہ اجازت لے کر اپنی سابقہ کمٹمنٹس مکمل کر رہے ہیں۔  
سابق ٹیسٹ آل راؤنڈر سہیل تنویر کو پی سی بی نے گذشتہ ماہ جونیئر چیف سلیکٹر مقرر کیا تھا، انھوں نے ایشیا کپ اور اب انڈر 19ورلڈکپ کا اسکواڈ بھی منتخب کیاہے، اہم ترین ذمہ داری سنبھالنے کے باوجود حیران کن طور پر سہیل تنویر بطور کرکٹر بھی ایکشن میں ہیں، وہ ان دنوں پیئر لینڈ کے موسیٰ اسٹیڈیم پر جاری امریکن پریمیئر لیگ میں پریمیئم پاکس کی نمائندگی کر رہے ہیں۔ 
حال ہی میں پریمیئم کینیڈینز کے خلاف سہیل تنویر نے 31 رنز بنائے اور15 رنز دے کر 2 وکٹیں بھی حاصل کیں۔ 
یاد رہے کہ سابق سینئر چیف سلیکٹر انضمام الحق کو ایجنٹ کی کمپنی کا شیئرہولڈر ہونے پر مفادات کے ٹکراؤ کا الزام سہنا پڑا، وہ بعدازاں مستعفی ہو گئے تھے، بعض حلقے سہیل تنویر کے امریکی لیگ کھیلنے کو بھی مفادات کا ٹکراؤ قرار دے رہے ہیں، حال ہی میں محمد حفیظ نے پاکستانی سینئر کرکٹ ٹیم ڈائریکٹر بننے کے بعد تمام لیگز کو خیرباد کہہ دیا تھا۔ 
اس حوالے سے رابطے پر پی سی بی کی ترجمان نے کہا کہ سہیل تنویر نے ہمیں پہلے ہی بتا دیا تھا کہ سابقہ کمٹمنٹ مکمل کرنے کے لیے انھیں امریکا جانا پڑے گا،انھوں نے اس سوال کا جواب نہ دیا کہ کیا جونیئر چیف سلیکٹر کا بطور کرکٹر کسی لیگ میں حصہ لینا مفادات کا ٹکراؤ نہیں ہے۔  
واضح رہے کہ بعض دیگر وجوہات کی بنا پر بھی مذکورہ لیگ پر سوال اٹھائے جا رہے ہیں۔ یاد رہے کہ پاکستانی انڈر 19 کرکٹ ٹیم ان دنوں لاہور میں تربیتی کیمپ میں شریک ہے، ورلڈکپ 19 جنوری کو جنوبی افریقہ میں شروع ہوگا۔