قومی ٹیم کے سابق نائب کپتان، آل رائونڈر شاداب خان کا کہنا ہے کہ محمد رضوان یقیناً ٹیم کے شاندار نائب کپتان ثابت ہوں گے، شائقین کرکٹ سے درخواست ہے کہ وہ رضوان کو بھرپور سپورٹ کریں۔
تفصیلات کے مطابق پاکستان کرکٹ بورڈ ( پی سی بی ) نے وکٹ کیپر بلے باز محمد رضوان کو پاکستان کی ٹی 20 ٹیم کا نائب کپتان مقرر کر دیا ہے اور وہ اپنی پہلی اسائنمنٹ میں نیوزی لینڈ کے خلاف 12 سے 21 جنوری تک کھیلی جانے والی پانچ میچز پر مشتمل ٹی ٹوئنٹی سیریز میں کپتان شاہین آفریدی کے نائب کے طور پر خدمات انجام دیں گے۔
وائٹ بال کرکٹ میں پاکستانی ٹیم کے سابق کپتان بابراعظم کے نائب کے طور پر کام کرنے والے آل رائونڈر شاداب خان نے رضوان کی حمایت کا اظہار کیا ہے اور شائقین کرکٹ سے انہیں سپورٹ کرنے کی اپیل کی ہے۔
سماجی رابطے کی ویب سائٹ ایکس (ٹوئٹر) پر جاری کردہ اپنے اپنی پوسٹ میں شاداب خان نے محمد رضوان کو ان کی تقرری پر مبارکباد دی اور ان کی صلاحیتوں پر اعتماد کا اظہار کیا۔
اپنے پیغام میں شاداب خان کا کہنا تھا کہ رضوان کو ٹی ٹوئنٹی ٹیم کا نائب کپتان مقرر کیے جانے پر مبارکباد پیش کرتا ہوں، میں جانتا ہوں کہ آپ شاہین آفریدی کے شاندار نائب ثابت ہوں گے۔
ان کا کہنا تھا کہ میں تمام شائقین سے درخواست کرتا ہوں کہ وہ رضوان اور نیوزی لینڈ کے خلاف سیریز میں قومی ٹیم کو سپورٹ کریں۔