پاکستان کے سابق اسٹار بلے باز شاہد آفریدی نے ورلڈ کپ کے لیے اپنے طور پر ایک ممکنہ پاکستانی اسکواڈ کا اعلان کیا ہے۔
شاہد آفریدی نے اس ممکنہ اسکواڈ میں چند ایسے کھلاڑی شامل کیے ہیں جو طویل عرصے سے پاکستانی اسکواڈ سے غیر حاضر رہے ہیں۔
پاکستانی ٹیم کے سابق کپتان شاہد آفریدی نے اکتوبر اور نومبر کے دوران بھارت میں ہونے والے آئی سی سی مینز ون ڈے ورلڈ کپ 2023 کے لیے اپنے طور پر ممکنہ پاکستانی اسکواڈ کا اعلان کرتے ہوئے اس میں شامل پلیئرز کی موجودگی کی وجہ بھی بتائی۔
ایک مقامی میڈیا چینل سے بات کرتے ہوئے بوم بوم آفریدی نے چند ایسے کھلاڑیوں کا ذکر کیا جو طویل عرصے سے پاکستانی اسکواڈ سے غیر حاضر رہے ہیں، جن میں خاص طور پر آل راؤنڈر عماد وسیم اور تیز گیند باز حسن علی اور ارشد اقبال شامل ہیں۔
انہوں نے عماد کی شاندار آل راؤنڈ کارکردگی کی تعریف کی اور اس بات پر زور دیتے ہوئے کہا کہ جب تیز گیند بازوں کو چیلنجز کا سامنا ہوتا ہے تو اس کے جیسے صلاحیتوں کے حامل بولر کا ٹیم میں ہونا، خاص طور پر نئی گیند کے ساتھ موثر ہونا بہت ضروری ہوجاتا ہے۔ ان کا کہنا تھا کہ ہمارے پاس دو طرح کے ٹریک ہوں گے، یا تو ہمیں سیمنگ ٹریک ملے گا یا بہت فلیٹ ٹریک۔
دیکھیں، بات یہ ہے کہ ہمارے پاس پہلے ہی اسپنرز موجود ہیں۔ بعض اوقات، اگر کوئی فاسٹ بولر اچھی باؤلنگ نہیں کر رہا ہے اور اسے مار پڑ رہی ہے، تو آپ کو عماد وسیم جیسے بولر کی ضرورت ہوگی جو نئی گیند کے ساتھ مخالف ٹیم کے لیے بہت خطرناک ثابت ہو سکتا ہے۔
شاہد آفریدی نے کہا کہ میں نے ان کی بلے بازی دیکھی ہے اور مجھے ان کے بارے میں بہت اعتماد محسوس ہوا۔ انہوں نے کچھ شاندار اننگز کھیلی ہیں۔ انہوں نے مزید کہا کہ وہ ایک ایسا کھلاڑی ہے جو دباؤ کو ہینڈل کرنا جانتا ہے، ذہنی طور پر مضبوط، کافی سینئر اور بہت ساری کرکٹ کھیل چکا ہے۔
سابق کپتان نے ارشد اقبال کی متاثر کن صفات کے لیے ان کی تعریف بھی کی اور انہیں ایک باصلاحیت بولر کے طور پر اجاگر کیا جس کی موجودگی ٹیم میں بہت اہم ہے۔
انہوں نے کہاکہ ارشد اقبال ایک مضبوط بولر کے طور پر بہت زبردست خصوصیات کا مالک ہے۔ وہ جارحیت کے ساتھ بولنگ کرتا ہے اور ان پچوں پر آپ کو ایک ایسے بولر کی ضرورت ہے جو تیز رفتار سے بولنگ کرے اور مخالف ٹیم کو دبائو میں لائے۔،،
شاہد آفریدی کا تشکیل دیا گیا ورلڈ کپ 2023 کا اسکواڈ:
بابر اعظم، شاداب خان (وی سی)، فخر زمان، امام الحق، سلمان علی آغا، افتخار احمد، محمد رضوان (وکٹ کیپر)، سعود شکیل، عماد وسیم، شاہین آفریدی، حارث رؤف، اسامہ میر، زمان خان، ارشد اقبال، حسن علی (فٹنس سے مشروط)