پرتھ ٹیسٹ میں ناکامی کے بعد قومی ٹیم کے بولنگ کوچ عمر گل پاکستانی پیسرز کے دفاع میں سامنے آ گئے۔
پرتھ میں میڈیا کانفرنس مکرتے ہوئے بولنگ کوچ عمر گل نے کہا کہ پاکستانی پیسرز نے مناسب اسپیڈ سے بولنگ کی، ٹیسٹ کرکٹ میں بولرز کی کوشش ہوتی ہے کہ پہلے ردھم حاصل کریں، ہمارے پیسرز چونکہ لمبے عرصے بعد طویل فارمیٹ کے میچ میں بولنگ کررہے ہیں، وائٹ بال سے آکر ریڈ بال میں بولنگ کرنا آسان نہیں ہوتا۔
انھوں نے کہا کہ شاہین شاہ آفریدی ہمارے مین بولر ہیں، پیسر لمبے عرصے سے ٹیسٹ کرکٹ نہیں کھیلے، ردھم میں آنے میں وقت لگے گا، ہمیں نئی گیند سے تھوڑی مشکل پیش آئی، پھر اچھا کم بیک کیا، دوسری نئی گیند بھی بہتر انداز میں استعمال کی، اس کا اندازہ اس بات سے لگایا جاسکتا ہے کہ حریف ٹیم کی تمام 10وکٹیں حاصل کیں۔
عمر گل نے امید ظاہر کی کہ پیسرز کی اسپیڈ میں بھی بہتری نظر آئے گی، وہ نئی گیند کا بھی مزید بہتر انداز میں استعمال کرسکتے ہیں۔
انھوں نے کہا کہ شاہین شاہ آفریدی توقعات کے مطابق اچھے ردھم کے ساتھ بولنگ کریں گے، نوجوان پیسرز کا ڈیبیو پر عمدہ بولنگ کرنا خوش آئند ہے، بیک اپ میں حسن علی، میر حمزہ اور وسیم جونیئر موجود ہیں مگر یہ دونوں بولرز ڈومیسٹک کرکٹ میں پرفارم کرکے آئے تھے، جسمانی اور ذہنی طور پر ٹیسٹ کرکٹ کے لیے تیار تھے، انھوں نے توقعات کے مطابق پرفارم بھی کیا۔
انھوں نے کہا کہ سلمان علی آغا فرسٹ کلاس میں باقاعدگی سے آف اسپن بولنگ کرتے ہیں، ان کی موجودگی سے قومی ٹیم کی بیٹنگ لائن بھی مزید اچھی ہوجاتی ہے۔