پاکستان کے فاسٹ بولر حسن علی جنوبی افریقہ کیخلاف میچ میں ٹیم کا حصہ نہیں ہوں گے جبکہ فخر زمان کی واپسی کا امکان ہے۔ ٹیم انتظامیہ کے مطابق حسن علی گذشتہ رات سے بخار میں مبتلا ہیں جس کے باعث انہوں نے جمعرات کو ٹریننگ سیشن میں بھی حصہ نہیں لیا۔ حسن علی روبصحت ہیں لیکن مکمل طور پر صحت یاب ہونے کیلئے انہیں جنوبی افریقہ کے خلاف میچ میں آرام دیا جائے گا۔
یاد رہے کہ حسن علی کو نسیم شاہ کے باہر ہونے کے باعث ٹیم میں شامل کیا گیا تھا۔ ورلڈ کپ کے پانچ میچز میں حسن علی آٹھ وکٹیں حاصل کرچکے ہیں۔
دوسری جانب فخر زمان اور محمد نواز کو جنوبی افریقہ کے خلاف میچ کے لیے فٹ قرار دیا گیا ہے۔ پروٹیز کیخلاف میچ میں حسن علی کی جگہ وسیم جونیئر کو شامل کیے جانے کا امکان ہے۔
ذرائع کے مطابق آج کے اہم میچ میں فخر زمان کی بھی ٹیم میں واپسی متوقع ہے۔ فخر زمان کی جنوبی افریقہ کے خلاف گزشتہ سال کی کارکردگی کو دیکھتے ہوئے انہیں امام الحق کی جگہ ٹیم میں شامل کیا جاسکتا ہے۔