پنجاب کےمشیربرائےکھیل وہاب ریاض کارمضان اسپورٹس سیریزکی میزبانی کااعلان

نیشنل ہاکی سٹیڈیم میں پریس کانفرنس کرتے ہوئے مشیر کھیل کا کہنا تھا کہ رمضان اسپورٹس سیریز میں 6 کھیلوں کے مقابلے ہوں گے جن میں ہاکی، فٹ بال، کرکٹ ٹیپ بال، کبڈی، ٹیبل ٹینس اور بیڈمنٹن شامل ہیں جبکہ تمام مقابلے رات کے اوقات میں ہوں گے۔

وہاب ریاض نے کہا کہ رمضان اسپورٹس سیریز کے انعقاد کا مقصد نگراں صوبے کے نوجوانوں کو صحت مند سرگرمیوں کے لئے پلیٹ فارم مہیا کرنا ہے، گراؤنڈ کھلاڑیوں سے آباد ہوں گے تو نیا ٹیلنٹ سامنے آئے گا، اسپورٹس کی ترقی اور فروغ کے لئے مزید ایونٹس کرائیں گے۔

انہوں نے کہا کہ اسپورٹس سیریز میں پنجاب کے تما م ڈویژنز سے 768 مرد و خواتین کھلاڑی اور 135 آفیشلز حصہ لیں گے، سیریز میں ہاکی ٹورنامنٹ 8 اے سائیڈ ہوگا، 20 ، 20 منٹ کے دو ہاف ہوں گے اگر کوئی کھلاڑی زخمی ہوگیا تو اس کی جگہ دوسرا کھلاڑی نہیں آئے گا۔

ان کا کہنا تھا کہ کبڈی کا کھیل پنجاب کے ماتھے کا جھومر ہے، پنجاب کے نوجوانوں میں کبڈی بہت مقبول ہے، سپورٹس سیریز میں کبڈی کا بڑا ٹاکرا رکھا ہے جس میں پنجاب بھر سے کھلاڑی حصہ لیں گے، کبڈی کی فاتح ٹیم کو 10لاکھ اور رنر اپ کو 5لاکھ روپے کے نقد انعامات دیں گے۔

ان کا مزید کہنا تھا کہ فٹ بال کی فاتح ٹیم کو 5 لاکھ روپے، رنر اپ کو 3 لاکھ اور تیسری پوزیشن لینے والی ٹیم کو 2لاکھ رو پے، کرکٹ ٹیپ بال کی فاتح ٹیم کو ایک لاکھ ، رنر اپ کو 50 ہزار اور تیسری پوزیشن لینے والی ٹیم کو 25 ہزار روپے دیں گے۔