وارنر کا کیچ کیوں ڈراپ ہوا؟ عبداللہ شفیق نے بتادیا  

قومی کرکٹ ٹیم کے اوپنر عبداللہ شفیق نے آسٹریلوی اوپنر ڈیوڈ وارنر کا کیچ چھوڑنے کے حوالے سے ہونے والی تنقید پر تبصرہ کردیا۔
میلبرن کرکٹ گراؤنڈ میں دوسرے روز کھیل کے اختتام پر عبداللہ شفیق نے میڈیا سے گفتگو کرتے ہوئے کہا کہ بدقسمتی سے ڈیوڈ وارنر کا اہم کیچ ڈراپ ہوا، اگر تھام لیتا تو آسٹریلیا کی اننگز جلدی سمٹ سکتی تھی۔ 
ٹیم پاکستان کے اوپنر نے کہا کہ کوئی بھی فیلڈر کیچ نہیں چھوڑنا چاہتا، میری غلطی تھی جس کو تسلیم کرتا ہوں۔  
عبداللہ شفیق نے کہا کہ میلبرن ٹیسٹ جیتنے کے لئے ہر کھلاڑی کوشش کررہا ہے لیکن کچھ چیزیں ہمارے ہاتھ میں نہیں ہوتیں، بابراعظم ایک بہترین بلےباز ہیں تاہم نیٹس میں جس طرح وہ پریکٹس کرتے ہیں، میدان پر نہیں اس انداز میں کھیل پارہے۔ یقیناً وہ اس وقت فارم میں نہیں تھے۔  
نوجوان کرکٹر نے آسٹریلوی کپتان کی تعریف کرتے ہوئے کہا کہ پیٹ کمنز کے اسپیل کا وہ آخری اوور تھا اگر کھیل جاتا تو آسٹریلیا پر پریشر بن سکتا تھا لیکن بدقسمتی سے گیند ہوا میں بلند ہوگئی۔ 
واضح رہے کہ عبداللہ شفیق نے کپتان شان مسعود کے ساتھ ملکر دوسری وکٹ کی شراکت میں 90 رنز کی پارٹنرشپ قائم کی تھی تاہم وہ پیٹ کمنز کا شکار بنے اور 62 کے انفراد اسکور پر پویلین لوٹ گئے۔