افغانستان پہلی بار ٹی20 ورلڈکپ کے سیمی فائنل میں پہنچ گیا

افغانستان نے بنگلہ دیش کو شکست دے کر ٹی ٹوئنٹی ورلڈ کپ 2024 کے سیمی فائنل کے لیے کوالیفائی کرلیا۔  افغان ٹیم کی فتح کے ساتھ ہی آسٹریلوی ٹیم ایونٹ سے باہر ہوگئی ہے۔ ٹی 20 کرکٹ کی تاریخ میں ایسا پہلی بار ہوا ہے کہ افغان ٹیم نے سیمی فائنل کے لیے کوالیفائی کیا ہے۔ 
تفصیلات کے مطابق آئی سی سی ٹی20 ورلڈکپ 2024 میں سپر ایٹ مرحلے کے اہم میچ میں افغانستان نے بنگلہ دیش کو ڈک ورتھ لوئس سسٹم کے تحت 8 رنز سے شکست دے کر پہلی مرتبہ سیمی فائنل تک رسائی حاصل کرلی۔ 
بارش سے متاثرہ میچ میں افغان ٹیم نے بنگلہ دیش کو 116 رنز کا ہدف دیا تاہم معمولی ہدف کا حصول بنگال ٹائیگرز کے لئے پہاڑ بن گیا اور پوری ٹیم محض 105 رنز بناکر پویلین لوٹ گئی، بنگلہ دیش کی جانب سے لٹن داس 54 رنز بناکر ناٹ آؤٹ رہے جبکہ دوسرے اینڈ سے یکے بعد دیگرے وکٹیں گرنے کا سلسلہ جاری رہا۔ 
دیگر بنگلہ دیشی کھلاڑیوں میں تنزید حسن، کپتان شکیب الحسن، رشاد حسین اور مستفیض الرحمان صفر پر پویلین لوٹے جبکہ توحید ہردوئے 14 اور سومیا سرکار 10 رنز بناکر نمایاں رہے۔ 
افغانستان کی جانب سے نوین الحق اور راشد خان نے 4، 4 کھلاڑیوں کو میدان بدر کیا۔
اس سے قبل میچ میں پہلے بیٹنگ کرتے ہوئے افغانستان کے بلےباز بھی مشکلات کا شکار رہے، افغان ٹیم کے کھلاڑی اسکور بورڈ پر بڑا ٹارگٹ سیٹ کرنے سے قاصر رہے اور مقررہ 20 اوورز میں 5 وکٹوں کے نقصان پر صرف 115 رنز بناسکے۔ 
افغان اوپنرز نے جارحانہ انداز اپنانے کے بجائے انتہائی محتاط انداز اختیار کیا، دونوں اوپنرزکے درمیان 10.4 اوورز میں صرف 59 رنز کی پارٹنر شپ بنی، ابراہیم زردان نے 29 گیندوں پر 18 رنز بنائے، جبکہ رحمان اللہ گرباز 55 گیندوں پر 43 رنز بنا کر آؤٹ ہوئے۔ بعد میں آنے والے بیٹسمین رنز کی رفتار بڑھانے کی کوشش میں کامیاب نہ ہو سکے، عظمت اللہ عمرزئی 10، گلبدین نائب 4 اور محمد نبی صرف 1 رن بنا سکے۔ کریم جنت 7 اور کپتان راشد خان 19 رنز پر ناٹ آؤٹ رہے۔ 
بنگلہ دیش کی جانب سے رشاد حسین نے 3 کھلاڑیوں کو آؤٹ کیا، تسکین احمد اور مستفیض الرحمان نے ایک، ایک وکٹ حاصل کی۔ 
میگا ایونٹ کا یہ میچ افغانستان کے لیے نہایت ہی اہم تھا، بنگلہ دیش کے خلاف اچھے مارجن سے میچ جیت کر افغانستان تاریخ میں پہلی بار ورلڈ کپ کے سیمی فائنل میں پہنچ گیا ہے۔ 
اسکواڈز: 
افغانستان: راشد خان (کپتان)، رحمان اللہ گرباز، ابراہیم زردان، گلبدین نائب، عظمت اللہ عمر زئی، محمد نبی، کریم جنت، نینگیالیہ خروٹے، نور احمد، نوین الحق، فضل حق فاروقی۔ 
بنگلہ دیش: نجم الحسن شانتو(کپتان)، لٹن داس، تنزید حسن، توحید ہردوائے، شکیب الحسن، محمود اللہ، سومیا سرکار، رشاد حسین، تسکین احمد، تنظیم حسن ثاقب، مستفیض الرحمان۔