اس جیت نے نیوزی لینڈ کو ٹورنامنٹ سے باہر کرتے ہوئے افغانستان کی سپر 8 راؤنڈ میں جگہ پکی کردی ہے۔
ٹی20 ورلڈکپ 2024 کے اہم مقابلے میں افغانستان نے زبردست کارکردگی دکھاتے ہوئے سپر 8 مرحلے تک رسائی حاصل کرلی ہے۔
تفصیلات کے مطابق آئی سی سی مینز ٹی 20 ورلڈ کپ میں افغانستان نے پاپوا نیوگنی (پی این جی) کو 7 وکٹوں سے شکست دے کر سپر 8 مرحلے تک رسائی حاصل کرلی۔
آئی سی سی مینز ٹی 20 ورلڈ کے 29 ویں میچ میں پاپوا نیوگنی نے افغانستان کو جیت کے لیے 96 رنز کا ہدف دیا تھا جو افغانستان نے 15.1 اوورز میں 3 وکٹوں کے نقصان پر حاصل کر لیا۔
افغانستان کی جانب سے گلبدین نائب سب سے نمایاں بیٹسمین رہے جنہوں نے 49 رنز کی ناقابل شکست اننگز کھیلی، محمد نبی 16 رنز پر ناٹ آؤٹ رہے، جبکہ رحمت اللہ گرباز 11 اور عظمت اللہ عمر زئی نے 13 رنز بنائے۔
پاپوا نیو گنی کی جانب سے ایلی ناؤ، سیمو کمیا اور نارمن نے 1،1 کھلاڑی کو آؤٹ کیا۔
اس سے قبل افغانستان نے ٹاس جیت کر پہلے فیلڈنگ کا فیصلہ کیا، پاپوانیوگنی کی پوری ٹیم 19.5 اوورز میں 95 رنزبناکر آؤٹ ہوگئی۔
پاپوا نیو گنی کی جانب سے کپلن ڈوریگا سب سے نمایاں بیٹسمین تھے جنہوں نے 27 رنز بنائے، ایلی ناؤ 13، ٹونی اورا11 اور چاڈسپر9رنز بنا کر آؤٹ ہوئے۔ پاپوا نیوگنی کے 3 کھلاڑی رن آؤٹ ہوئے۔
افغانستان کے فضل حق فاروقی نے 3 کھلاڑیوں کو پویلین کی راہ دکھائی، جبکہ نوین الحق نے 2 اور نور احمد نے 1 وکٹ حاصل کی۔
میگا ایونٹ کے گروپ سی میں 6 پوائنٹس حاصل کرکے افغانستان نے سپر 8 مرحلے کے لیے کوالیفائی کرلیا ہے۔
واضح رہے کہ افغانستان اپنے گروپ میں ٹی ٹوئنٹی ورلڈ کپ کے 2 میچز کھیل کر دونوں میں کامیابی حاصل کرچکا ہے،افغانستان نے اپنے پہلے میچ میں یوگنڈا کو 125 رنز سےاور دوسرے میچ میں نیوزی لینڈ کو 84 رنز سے ہرایا تھا۔
اسکواڈز:
افغانستان: راشد خان (کپتان)، رحمت اللہ گرباز (وکٹ کیپر)، ابراہیم زردان، گلبدین نائب، عظمت اللہ عمرزئی، محمد نبی، نجیب اللہ زردان، کریم جنت،نور احمد، نوین الحق، فضل حق فاروقی۔
پاپوا نیوگنی: ٹونی اورا، اسد والا (کپتان)، لیگا سیاکا، سیسی باؤ، ہیری ہیری، چاڈ سوپر، کپلن ڈوریگا (وکٹ کیپر)، نارمن وینوا، ایلی ناؤ، جان کریکو، سیمو کمیا۔