قومی اسکواڈمیں حسن علی کی شمولیت، اسامہ میرکو باہربٹھانے پرآفریدی حیران

پاکستانی ٹیم کے سابق کپتان شاہد آفریدی نے آئرلینڈ اور انگلینڈ کے ساتھ شیڈول سیریز کے لیے حالیہ قومی اسکواڈ کے اعلان میں تیز گیند باز حسن علی کے انتخاب پر حیرت کا اظہار کیا ہے۔ 
ایک مقامی نیوز چینل پر بات چیت کرتے ہوئے شاہد آفریدی نے ٹیم میں ایک تجربہ کار بیک اپ باؤلر کی ضرورت کو تسلیم کیا لیکن حسن علی کی حالیہ کارکردگی پر سوال اٹھایا۔ انہوں نے مشورہ دیا کہ نوجوان تیز گیند باز زمان خان یا محمد علی حسن علی کے بجائے زیادہ بہتر آپشن ہوتے۔ 
ان کا کہنا تھا کہ حسن علی کی سلیکشن پر میں بھی قدرے حیران ہوا۔ ہو سکتا ہے کہ سلیکشن کمیٹی نے سوچا ہو کہ ہمیں ایک تجربہ کار بیک اپ باؤلر کی ضرورت ہے لیکن اگر میں کارکردگی کی بات کروں تو مجھے حسن علی کی ایسی کوئی کارکردگی نظر نہیں آتی۔،،
شاہد آفریدی نے کہا کہ میں سوچ رہا تھا کہ زمان خان یا محمد علی کو منتخب کیا جا سکتا ہے مگر حیرت انگیز طور پر ایسا نہیں ہوسکا۔،، 
شاہدآفریدی نے اسامہ میر کو باہر بٹھانے کا جواز پیش کیا جنہوں نے کچھ اچھی پرفارمنسز کے باوجود کارکردگی میں عدم تسلسل کا مظاہرہ کیا۔ 
سابق کپتان کا کہنا تھا کہ اسامہ نے اچھی کارکردگی کا مظاہرہ کیا لیکن وہ اپنی باؤلنگ میں تسلسل نہیں دکھا سکے۔ لیکن ایمانداری سے کہوں تو مجھے لگتا ہے کہ سلیکشن کمیٹی کے لیے اسامہ کو بنچ پر بٹھانا ایک مشکل فیصلہ ہوتا۔ انہوں نے دیکھا ہوگا کہ شاداب، عماد اور افتخار ان کے اسپننگ آپشنز ہیں۔ آغا سلمان بھی بولنگ کرتے ہیں اور صائم ایوب بھی۔ تو بہت سارے آپشنز ہیں۔،، 
انہوں نے مزید کہا کہ شاید اسامہ میرکو اس لیے بنچ پر بٹھادیا گیا کیونکہ وہ بہت اچھی کارکردگی کا مظاہرہ نہیں کر رہے تھے۔،، 
یہ بات قابل غور ہے کہ پاکستان کی سلیکشن کمیٹی نے جمعرات کو آئرلینڈ اور انگلینڈ کے درمیان ہونے والی ٹی ٹوئنٹی سیریز کے لیے 18 رکنی اسکواڈ کا اعلان کیا تھا۔ قومی سلیکشن کمیٹی حارث رؤف، حسن علی اور سلمان علی آغا کو 18 کھلاڑیوں پر مشتمل اسکواڈ میں واپس لائی ہے، جبکہ اسامہ میر اور زمان خان فائنل اسکواڈ میں جگہ نہیں بناسکے۔