آئی پی ایل: گمبھیر، نوین الحق آپے سے باہر! کوہلی سے الجھنے کی ویڈیو وائرل

گزشتہ روز آئی پی ایل میں لکھنؤ سپر جائنٹس اور رائل چیلنجرز بنگلور کے درمیان اہم میچ کھیلا گیا، ہوم گراؤنڈ پر لکھنو کی ٹیم کو شکست کا منہ دیکھنا پڑا جس کی وجہ سے ٹیم کے مینٹور اور کھلاڑی غصے میں دکھائی دیئے۔

رائل چیلنجرز بنگلور نے پہلے کھیلتے ہوئے 9 وکٹوں کے نقصان پر 126 رنز بنائے،جواب میں لکھنؤ سپر جائنٹس کی ٹیم 108 رنز پر ڈھیر ہوگئی، ہدف کے تعاقب میں جب سپر جائنٹس کی بیٹنگ کے دوران بیٹر نوین الحق اور بنگلور کے فلیڈر ویرات کوہلی کے درمیان لفظی جنگ کا آغاز ہوا تاہم امپائرز اور ساتھی کرکٹرز نے بیچ بچاؤ کروایا۔

میچ کے اختتام پر لفظی جنگ ختم نہیں ہوئی بلکہ رائل چیلنجرز بنگلور نے لکھنؤ کو شکست دی تو میچ کے آخر میں دونوں ٹیموں کے کھلاڑیوں کے آپس میں ہاتھ ملانے کے دوران نوین الحق اور ویرات کوہلی کے درمیان ایک بار پھر تلخ کلامی ہوئی جس میں بعدازاں لکھنو سپر جائنٹس کے مینٹور گوتم گھمبیر بھی شامل ہوگئے۔

پہلے گوتم نے نوین الحق کو کوہلی کے سے بات کرتے ہوئے روکا اور پھر جب کوہلی غصے میں جملے کسنے پر آئے تو گھمبیر بھی غصے میں آگئے اور دونوں کرکٹرز کے درمیان تلخ کلامی ہوئی جس میں دونوں ٹیموں کے کپتانوں، کھلاڑیوں اور امپائرز کو بیچ بچاؤ کروانا پڑا۔

 واضح رہے کہ یہ پہلا موقع نہیں ہے جب افغان کرکٹر نوین الحق نے فیلڈ میں تلخ لہجہ اپنایا ہوا، اس سے قبل لنکن پریمیئر لیگ کے میچ میں محمد عامر اور نوین الحق کے درمیان تلخ کلامی ہوئی تھی، جس پر شاہد آفریدی نے بھی غصے کا اظہار کیا تھا۔

دوسری جانب گوتم گھمبیر سال 2014 کے آئی پی ایل میچ کے دوران کولکتہ کی نمائندگی کرتے ہوئے بھی ویرات کوہلی سے الجھ چکے ہیں۔