ایشوریہ رائے پرنازیبا تبصرہ: شعیب اخترنے بھی رزاق کے بیان کی مذمت کردی

راولپنڈی ایکسپریس کے نام سے مشہور سابق پاکستانی اسپیڈ اسٹار شعیب اختر نے بھی بالی ووڈ اداکارہ ایشوریا رائے سے متعلق عبدالرزاق کے غیر ذمے دارانہ بیان پر اپنے ردعمل کا اظہار کردیا۔ 
سماجی رابطے کی ویب سائٹ ٹوئٹر (ایکس) پر ایک ٹوئٹ میں سابق اسپیڈ اسٹار شعیب اختر نے عبدالرزاق کے نامناسب لطیفے کی مذمت کرتے ہوئے کہا کہ کسی بھی خاتون کی اس طرح بے عزتی نہیں ہونی چاہیے، اس کے پاس بیٹھے لوگوں کو ہنسنے اور تالیاں بجانے کے بجائے فوراً آواز بلند کرنی چاہیے تھی اور اسے ٹوکنا چاہیے تھا۔ 
گزشتہ روز ہی سابق کرکٹر عبدالرزاق نے بھارتی اداکارہ ایشوریا رائے سے متعلق اپنے متنازع بیان پر معافی مانگ لی تھی جبکہ شاہد آفریدی نے وضاحت پیش کرتے ہوئے کہا تھا کہ تقریب کے دوران عبدالرزاق کی بات غور سے نہیں سنی تھی کہ انہوں نے کیا کہا کیونکہ محفل میں تمام افراد ہنس رہے تھے تو میں بھی ہنسنے لگا۔ 
انہوں نے کہا کہ عبدالرزاق کی عادت ہے کہ وہ تفریح کرتا رہتا ہے، میں جانتا تھا کہ اس کے ہاتھ میں مائیک ہے اور وہ کچھ کہے گا تاہم جب تقریب سے واپس گھر آیا تو کسی نے میرے ساتھ کلپ شیئر کیا اور پھر مجھے احساس ہوا کہ اس نے اصل میں کیا کہا تھا۔