سری لنکا نے 27 سال بعد بھارت کے خلاف ون ڈے سیریز جیت لی

سری لنکا نے بھارت کو تیسرے ایک روزہ میچ میں شکست دے کر 27 سال بعد ون ڈے سیریز سے جیت لی۔ بھارت کو آئی لینڈرز کے ہاتھوں تیسرے ایک روزہ میچ میں 110 رنز سے شکست کا منہ دیکھنا پڑا۔ سری لنکا نے سیریز میں دو صفر سے کامیابی حاصل کی۔ 
تفصیلات کے مطابق کولمبو میں کھیلے گئے ایک روزہ سیریز کے تیسرے اور آخری میچ میں سری لنکا نے ٹاس جیت کر پہلے بیٹنگ کا فیصلہ کیا اور مقررہ 50 اوورز میں 7 وکٹوں کے نقصان پر 248 رنز بنائے۔ 
سری لنکا کی جانب سے اوِشکا فرنینڈو 96 رنز بنا کر نمایاں رہے۔ کوشل مینڈس 59، پاتھم نسانکا 45، کپتان چرتھ اسالانکا 10، جنیتھ لیانگا 8، دونیتھ ویلالاگے 2 اور سدیرا سماراوکرما 0 رن بنا کر آؤٹ ہوئے۔ کمنڈو مینڈس 23 اور مہیش ٹھیکشانا 3 رنز بنا کر ناٹ آؤٹ پویلین لوٹے۔  
بھارت کی جانب سے ریان پراگ نے 3، کلدیپ یادو، واشنگٹن سندر، اکشر پٹیل اور محمد سراج نے 1، 1 وکٹ حاصل کی۔ 
ہدف کے تعاقب میں بھارت کی ٹیم 27 ویں اوور میں 138 رنز بنا کر آؤٹ ہوگئی، کپتان روہت شرما 35 رنز بنا کر آؤٹ ہوئے۔ واشنگٹن سندر 30، ویرات کوہلی 20، ریان پراگ 15، شیوم دوبے 9، شریاس ائیر 8، رشبھ پنت 6، شبھمن گِل 6، کلدیپ یادو 6 اور اکشر پٹیل 2 رنز بناکر آؤٹ ہوئے۔ محمد سراج 0 رن بنا کر ناٹ آؤٹ رہے۔  
سری لنکا کی جانب سے دونیتھ ویلالاگے نے 5.1 اوور میں 5 کھلاڑیوں کو آؤٹ کرکے بھارتی بیٹنگ لائن کے پرخچے اڑا دیے۔ مہیش ٹھیکشانا اور جیفری وینڈرسے نے 2، 2 جبکہ اسیتھا فرنینڈو نے 1 وکٹ حاصل کی
میچ کے بعد کی پریزینٹیشن میں کپتان چارتھ اسالنکا نے ہندوستان کے مڈل آرڈر کو روکنے پر اپنے اسپنرز کی تعریف کی اور پوری سیریز میں ٹاپ آرڈر کی کارکردگی کو اجاگر کیا۔ 
سری لنکا کے ٹی 20 کپتان کے طور پر چارتھ اسالنکا کا پہلا دور اچھا نہیں رہا، لیکن ون ڈے کپتان کے طور پر ان کی تقرری کے فوری نتائج برآمد ہوئے، سری لنکا نے تقریباً 30 سال بعد بھارت کے خلاف ون ڈے سیریز جیتی ہے۔