بھارتی ٹیم کے ہیڈ کوچ کا عہدہ کیوں نہیں لیا، اشیش نہرا نے بتادیا

بھارت کے سابق لیفٹ ہینڈ فاسٹ بولر اور آئی پی ایل فرنچائز کے کوچ اشیش نہرا نے بھارتی ہیڈ کوچ کی ذمہ داری نہ لینے کے حوالے سے اہم انکشاف کردیا۔ گجرات ٹائنٹنز کے کوچ نے بھارتی ہیڈ کوچ کے عہدے کے لیے درکارصلاحیت اور تجربہ ہونے کے باوجود عہدے کے لیے درخواست نہیں دی تھی، جی ٹی کے ہیڈ کوچ اشیش نہرا نے اب اس راز سے پردہ اٹھایا ہے کہ وہ بھارتی کرکٹ ٹیم میں راہول ڈریڈ کی پوزیشن لینے کے خواہشمند کیوں نہیں تھے۔
اشیش نہرا نے کہا کہ میں نے اس کے بارے میں نہیں سوچا تھا کیوں کہ میرے بچے چھوٹے ہیں، گوتم کے بچے بھی چھوٹے ہیں لیکن ہر ایک کے خیالات مختلف ہوتے ہیں۔ میں جہاں ہوں وہاں بہت خوش ہوں، میں نو دس ماہ تک مسلسل سفر کرنے کے موڈ میں نہیں ہوں۔،،  
سابق بھارتی کرکٹر نے نئے ہیڈ کوچ گوتم گمبھیر کی تعریف کی اور کہا کہ وہ بڑی ذمے داری کے ساتھ اپنے طور طریقے تبدیل نہیں کریں گے بلکہ کھیل کے بارے میں اور زیادہ پُرجوش ہوں گے۔،، 
اشیش نہرا نے کہا کہ گوتم گمبھیر کے جذبے، لگن اور تجربے کو مدنظر رکھتے ہوئے میں اعتماد کے ساتھ یہ کہہ سکتا ہوں کہ وہ ٹیم میں بڑی تبدیلیاں کرنے والا ہے اور مجھے یقین ہے کہ وہ جو بھی کرے گا اچھا ہی کرے گا۔،، 
انھوں نے کہا کہ ایک بات تو یقینی ہے جو اس کی شخصیت ہے وہ اسے کبھی نہیں بدلے گا، میں نے اسے اتنے سالوں میں دیکھا ہے، کرکٹ اس کا جنون ہے اور وہ ہمیشہ ایک جیسا اور بہت پرجوش رہتا ہے۔،،