بھارتی کرکٹرایشون نےپاکستان کوایشیاءکپ اورورلڈکپ کی فیورٹ ٹیم قراردے دیا

بھارتی کرکٹر روی چندرن ایشون نے ایشیاءکپ 2023 کے لیے بھارت کے ساتھ ساتھ پاکستان کو ٹرافی کے مضبوط دعویدار اور‘پسندیدہ ٹیم’ کے طور پر منتخب کیا ہے۔ 
اپنے یوٹیوب چینل پر بات چیت کرتے ہوئے ایشون نے کہا کہ پاکستان کی کامیابی کا انحصار پاکستان کے کپتان بابر اعظم اور وکٹ کیپر بلے باز محمد رضوان کی آنے والے مہینوں میں مسلسل کارکردگی پر ہے ان کی فارم ممکنہ طور پر ایشیاءکپ اور ون ڈے ورلڈ کپ میں مخالفین کے لیے اہم چیلنجز کا باعث بن سکتی ہے۔ 
انہوں نے کہا کہ اگر بابراعظم اور محمد رضوان مڈل آرڈر میں بلے کے ساتھ مسلسل کارکردگی دکھاتے ہیں تو پاکستان اس ایشیاءکپ اور ورلڈ کپ میں جانے والی مضبوط ٹیم کے طور پر ابھرے گی کیونکہ کرکٹ کی دنیا میں پاکستان ایک غیر معمولی ٹیم ہے۔ 
ایشون نے یہ بھی بتایا کہ بھارتی ٹیم کے ساتھ ساتھ پاکستان بھی اس سال ایشیاءکپ کے لیے فیورٹ ہے۔ ان کا کہنا تھا کہ پاکستان نے ہمیشہ غیر معمولی کرکٹرز پیدا کیے ہیں ٹیپ بال کرکٹ کی وجہ سے، ان کے پاس ہمیشہ فاسٹ بولرز آتے رہے ہیں۔ 90 اور 2000 کی دہائی کے آخر میں ان کی بیٹنگ خاص رہی ہے اور اب گزشتہ 5-6 سال میں مختلف لیگز کی وجہ سے پاکستانی ٹیم دوبارہ ابھر رہی ہے، ان کے پاس پی ایس ایل جیسا اہم پلئیٹ فارم ہے اور بی بی ایل میں بھی 60 سے 70 فیصد پاکستانی کھلاڑی شامل ہیں۔