ایشیاء کپ: نیپال کے خلاف میچ میں بابراعظم نے سنچری بنالی

ملتان میں جاری ایشیاء کپ کے افتتاحی میچ میں پاکستان نے نیپال کے خلاف ٹاس جیت کر پہلے بیٹنگ کرتے ہوئے 42 اوورز میں 4 وکٹوں کے نقصان پر 230 رنز بنالیے۔ 
ملتان میں کھیلے جارہے اس میچ میں اوپنر فخر زمان ایک مرتبہ پھر کوئی خاطر خواہ کارکردگی دکھانے میں ناکام رہے وہ محض 14 رنز بنا کر وکٹ گنوا بیٹھے جبکہ امام الحق 5 بناکر اور محمد رضوان 44 رنز بناکر رن آؤٹ ہوئے جبکہ آغا سلمان 5 رنز کے مہمان ثابت ہوئے۔ کپتان بابراعظم نے ون ڈے کیریئر کی انیسویں سنچری بنالی ہے اور وہ 103 پر جبکہ افتخار احمد 52 رنز بناکر کریز پر موجود ہیں۔ 
نیپال کی جانب سے کرن کے سی اور سندیپ لامیچھانے نے ایک ایک وکٹ حاصل کی۔
ٹورنامنٹ کے افتتاحی میچ میں قومی ٹیم کے کپتان بابراعظم نے ٹاس جیت کر پہلے بیٹنگ کرنے کا فیصلہ کیا تھا، انہوں نے کہا کہ پچ بیٹنگ کیلئے سازگار ہے کوشش ہوگی حریف ٹیم کے خلاف بڑا اسکور بنائیں۔ 
اس موقع پر نیپالی ٹیم کے کپتان روہت پوڈیل نے کہنا تھا کہ اگر ٹاس جیتتے تو پہلے بیٹنگ کرتے تاہم کوشش کریں گے ابتداء میں پاکستانی ٹیم پر پریشر بڑھائیں اور جلد وکٹیں لیں۔

پاکستان کا اسکواڈ:
کپتان بابراعظم، فخر زمان، امام الحق، محمد رضوان، آغا سلمان، افتخار احمد، شاداب خان، محمد نواز، شاہین شاہ آفریدی، نسیم شاہ اور حارث رؤف۔

نیپال کا اسکواڈ: 
کپتان روہت پوڈیل، کشال بھرٹیل، آصف شیخ، عارف شیخ، کشال مالا، دیپیندر سنگھ ایری، گلشن جھا، سومپال کامی، کرن کے سی، سندیپ لامیچھانے اور للت راج بنشی۔