ایشیاکپ کے پاکستان میں انعقادکی راہیں ہموار،افغان بورڈکی یقین دہانی سامنے آگئی

پاکستان کرکٹ بورڈ (پی سی بی) کے ہائبرڈ ماڈل پر عمل در آمد کے لئے ایشیاکپ کے انعقاد کی راہمیں ہموار ہونا شروع ہوگئیں۔

میڈیا رپورٹس کے مطابق بنگلہ دیش اور سری لنکا کے بعد افغانستان اور نیپال کے کرکٹ بورڈز نے بھی بذریعہ ای میل پاکستان میں ایشیا کپ کھیلنے کی یقین دہانی کروادی ہے۔

رپورٹس میں دعویٰ کیا گیا ہے کہ ایشیاکپ میں شریک بھارتی ٹیم کے علاوہ دیگر بورڈز نے پاکستان کو سپورٹ کرنے کی یقین دہانی کروائی ہے۔

پاکستان کرکٹ بورڈ کی جانب سے تجویز کردہ ہائبرڈ ماڈل پر بورڈز کو کوئی اعتراض نہیں لیکن متحدہ عرب امارات (یو اے ای) میں گرمی زیادہ ہونے کی وجہ سے کرکٹرز کی انجریز کے باعث کھیلنے کے لئے تیار نہیں ہیں۔

ذرائع کا کہنا ہے کہ بھارت کا اب ہائبرڈ ماڈل پر اعتراض کوئی اہمیت نہیں رکھتا اور پی سی بی کے ہائبرڈ ماڈل میں بھارت کا پاکستان میں کھیلنا شامل نہیں۔

دوسری جانب ایشین کرکٹ کونسل (اے سی سی) کا ایشیاکپ کے حوالے سے اندرونی اجلاس آئندہ ایک دو روز میں ہونے کا امکان ہے، جس میں سیکریٹری بی سی سی آئی جے شاہ بھی شرکت کریں گے۔

واضح رہے کہ پاکستان کرکٹ بورڈ ٹکٹوں کی فروخت اور گیٹ منی کے لیے ایشیاکپ یو اے ای میں کروانا چاہتا ہے اور ماضی میں ایشیاکپ اور آئی پی ایل ستمبر میں ہوچکے ہیں، جس پر پی سی بی اپنا موقف پیش کرے گا۔