ایشیاءکپ کا باضابطہ آغاز، پاکستان اور نیپال ملتان میں مدمقابل

ایشیاء کپ کا باضابطہ آغاز ہوگیا، ملتان اسٹیڈیم میں پاکستان نے نیپال کیخلاف ٹاس جیت کر افتتاحی میچ میں پہلے بیٹنگ کا فیصلہ کیا۔
پاکستان کی میزبانی میں ایشیاء کپ 30 اگست سے 17 ستمبر تک کھیلا جائے گا۔ 
ایشیاء کپ میں نیپال کےخلاف افتتاحی میچ کیلئے قومی ٹیم کا اعلان گذشتہ روز ہی کردیا گیاتھا۔ ٹیم کے کپتان بابراعظم رہیں گے جبکہ شاداب خان نائب کپتان ہوں گے۔ قومی ٹیم میں فخر زمان، محمد رضوان، امام الحق، سلمان علی آغا پلیئنگ اسکواڈ میں شامل ہیں۔ اس کے علاوہ افتخاراحمد، محمد نواز، نسیم شاہ، شاہین آفریدی اور حارث رؤف بھی ٹیم کا حصہ ہیں۔ 
ایشیاء کپ کے شیڈول کے مطابق افتتاحی میچ 30 اگست یعنی آج پاکستان اور نیپال کے درمیان ملتان میں کھیلا جارہا ہے۔ 
31 اگست کو کینڈی میں بنگلہ دیش اور سری لنکا کی ٹیمیں مد مقابل ہوں گی، روایتی حریف پاکستان اور بھارت کے درمیان میچ 2 ستمبر کو کینڈی میں کھیلا جائے گا، 3 ستمبر کو بنگلہ دیش اور افغانستان قذافی اسٹیڈیم لاہور میں مدمقابل ہوں گے۔ 4 ستمبر کو بھارت اور نیپال کا مقابلہ کینڈی میں ہوگا، 5 ستمبر کو افغانستان اور سری لنکا لاہور میں آمنے سامنے ہوں گے۔
اس کے علاوہ سپر 4 مرحلے کا ایک میچ بھی لاہور میں کھیلا جائے گا جبکہ سپر 4 مرحلے کے 5 میچز کولمبو میں ہوں گے۔ 9 اور 10 ستمبر کو سپر فور مرحلے کے 2 میچ کینڈی میں ہوں گے، سپر فور مرحلے کے 3 میچوں کی میزبانی دمبولا کے پاس ہے، جبکہ ایشیاء کپ 2023 کا فائنل 17 ستمبر کو کولمبو میں کھیلا جائے گا۔