رپورٹس کے مطابق دونوں ملکوں کے بورڈز کو پہلا راؤنڈ پاکستان میں کھیلنے پر کوئی اعتراض نہیں ہے۔
١٧ مئی ٢٠٢٣
پاکستان کرکٹ بورڈ (پی سی بی) کو ہائبرڈ ماڈل پر بنگلہ دیش اور سری لنکا نے گرین سگنل دے دیا۔ میڈیا رپورٹس کے مطابق ایشیاکپ کے دو مستقل اراکین بنگلہ دیش اور سری لنکا نے ایشیا کپ کے انعقاد کے حوالے سے پاکستان کرکٹ بورڈ (پی سی بی) کو ہائبرڈ ماڈل پر گرین سنگل دیا ہے، دونوں ملکوں کے بورڈز کو پہلا راؤنڈ پاکستان میں کھیلنے پر کوئی اعتراض نہیں۔
رپورٹس میں کہا گیا ہے کہ بنگلہ دیش اور سری لنکن بورڈز نے بذریعہ ای میل پی سی بی حکام کو یقین دہانی کروائی ہے، تاہم اس سلسلے میں براہ راست کوئی رابطہ نہیں کیا گیا۔
دوسری جانب ایشین کرکٹ کونسل (اے سی سی) کا ایشیاکپ کے حوالے سے اندرونی اجلاس آئندہ ایک دو روز میں ہونے کا امکان ہے، جس میں سیکریٹری بی سی سی آئی جے شاہ کی شرکت کا بھی امکان ہے۔
پاکستان کرکٹ بورڈ گیٹ منی کے باعث متحدہ عرب امارات (یو اے ای) میں ایشیاکپ کا انعقاد کروانا چاہتا ہے تاہم بھارت نے اس کی بھی مخالفت کرتے ہوئے وہاں کے شدید گرم موسم کا جواز پیش کیا تھا۔
میڈیا رپورٹس میں کہا گیا ہے کہ اگر ہائبرڈ ماڈل کو منظور کرلیا جاتا ہے تو پی سی بی نیوٹرل وینیو پر بھی لچک دکھا سکتا ہے۔
.jpg)
