ایشیاکپ: سری لنکا میں شیڈول میچزکے ٹکٹ بھی فروخت کے لئے پیش

 شائقین کرکٹ کے لئے پاکستان کرکٹ بورڈ (پی سی بی) اور ایشین کرکٹ کونسل (اے سی سی) کی طرف سے سری لنکا میں شیڈول میچز کے ٹکٹس بھی فروخت کیلئے پیش کردیئے گئے ہیں۔ 
فینز ایک پاسپورٹ پر چار ٹکٹس آن لائن بُک کرکے سری لنکا میں جاکر میچز سے لطف اندوز ہوسکتے ہیں، سری لنکا میں 31 اگست کو پہلا میچ کینڈی میں بنگلہ دیش اور سری لنکا کے درمیان ہوگا،جس کا سستا ترین ٹکٹ 5 ڈالرز کا رکھا گیا ہے جبکہ مہنگا ترین ٹکٹ 200 ڈالرز میں خریدا جاسکتا ہے۔  
پاکستان اور بھارت کے درمیان میچز کے ٹکٹس کی قیمت زیادہ رکھی گئی ہے، جن کی فروخت کا آغاز شام کے اوقات میں ہوگا، روایتی حریفوں کا میچ دیکھنےمیں دلچسپی رکھنے والوں کو 20 ڈالر، 50 ڈالر، 120 ڈالر کی ادائیگی کرنا ہوگی جبکہ وی وی آئی پی ٹکٹ 500 ڈالرز تک کا ہوگا۔ 
ٹکٹس کی بکنگ کے بعد سری لنکا ایمبیسی کی ویب سائٹ پر جاکر ویزہ کے لیے درکار تمام معلومات دینا ہوں گی، ایک پاسپورٹ پر عام میچز کے چار ٹکٹس بک کروائے جاسکتے ہیں۔ 
پاکستان اور بھارت کے میچ کے لیے صرف دو ٹکٹس ایک پاسپورٹ پر جاری کیے جائیں گے۔ 
واضح رہے کہ ایشیاکپ کا افتتاحی میچ 30 اگست کو ملتان میں پاکستان اور نیپال کے درمیان کھیلا جائے گا، 31 اگست کو کینڈی میں بنگلا دیش اور سری لنکا کی ٹیمیں مد مقابل ہوں گی، روایتی حریف پاکستان اور بھارت کے درمیان میچ دوستمبر کو کینڈی میں کھیلا جائے گا جبکہ ایشیاکپ کا فائنل 17 ستمبر کو کولمبو میں ہوگا۔