ایشین گیمز:پاکستان مینز ٹیم کا اعلان، کپتان کون ہوگا

پاکستان کرکٹ بورڈ (پی سی بی) نے ایشین گیمز کیلئے مینز ٹیم کا اعلان کردیا۔ 
ایکسپریس نیوز کے مطابق 23 ستمبر سے 8 اکتوبر تک چین کے شہر ہانگزو میں ہونے والی ایشین گیمز کیلئے قومی مینز اسکواڈ کو حتمی شکل دے دی گئی ہے، قومی ٹیم کی قیادت کے فرائض قاسم اکرم نبھائیں گے۔ 
ذرائع کا کہنا ہے کہ پاکستان اولمپکس ایسوسی ایشن کوبھجوائی جانے والی فہرست میں قاسم اکرم(کپتان) حیدر علی، آصف علی، خوشدل شاہ، طاہر بیگ، عمیربن یوسف، روحیل نذیر، محمد اخلاق، محمد حسنین، عامر جمال، ارشد اقبال، شاہنواز دھانی، عرفات منہاس، عثمان قادر اور صفیان مقیم کے نام شامل ہیں۔
 قبل ازیں گزشتہ روز ایشین گیمز کیلئے قومی ویمنز ٹیم کا اعلان کیا گیا تھا جبکہ سابق کپتان بسمہ معروف اسکواڈ کا حصہ نہیں ہوں گی تاہم ڈیانا بیگ کی ٹیم میں واپسی ہوئی ہے جبکہ انڈر19 ویمنز ٹی20 ورلڈکپ اور ایمرجنگ ویمنز ایشیاکپ میں شاندار پرفارمنس دکھانے پرانوشے ناصر اور شوال ذالفقار کو قومی اسکواڈ کا حصہ بنایا گیا ہے۔ 
پاکستان کی ویمنز ٹیم 2010 ء میں چین میں ہونے والے ایشین گیمز اور پھر2014ء میں جنوبی کوریا میں ہونے والے ایشین گیمز کے کرکٹ مقابلوں میں گولڈ میڈل جیت چکی ہے اور اس کی نظریں اب ہیٹ ٹرک مکمل کرنے پر مرکوز ہیں۔