پہلے ون ڈے میں آسٹریلیا نے پاکستان کو ہرا دیا

شارجہ: پہلے ون ڈے میں آسٹریلیا نے پاکستان کو 8 وکٹوں سے شکست دے کر پانچ میچوں کی سیریز میں ایک صفر کی برتری حاصل کرلی۔

شارجہ میں کھیلے گئے میچ میں پاکستان کے 281 رنز کے ٹارگٹ کا کامیابی سے تعاقب کرتے ہوئے کینگروز نے مطلوبہ ہدف 2 وکٹوں پر حاصل کرلیا، کپتان ایرون فنچ اور شان مارش کے درمیان دوسری وکٹ پر 172 رنز کی شراکت داری قائم ہوئی جو میچ وننگ ثابت ہوئی۔

ایرون فنچ نے 8 چوکوں اور 4 چھکوں کی مدد سے 116 رنز بنائے جب کہ شان مارش 91 اور ہینڈکومب 30 رنز بنا کر ناٹ آؤٹ رہے، عثمان خواجہ نے 24 رنز کی باری کھیلی۔

پاکستان کی جانب سے فہیم اشرف اور محمد عباس نے ایک ایک وکٹ حاصل کی، ان کے علاوہ کوئی بولر بھی خاطر خواہ کارکردگی کا مظاہرہ نہ کرسکا۔

اس سے قبل ٹاس قومی ٹیم کے کپتان شعیب ملک نے جیت کر پہلے بیٹنگ کرنے کا فیصلہ کیا، قومی ٹیم نے مقررہ اوورز میں 5 وکٹوں پر 281 رنز بنائے، ٹیم میں واپس آنے والے حارث سہیل نے 112 گیندوں پر سنچری اسکور کی جو ان کے کیریئر کی پہلی سنچری ہے۔

پاکستان کی جانب سے امام الحق اور شان مسعود نے اننگز کا آغاز کیا لیکن امام 35 رنز کے مجموعی اسکور پر 17 رنز بنانے کے بعد ناتھن لیون کے ہاتھوں آؤٹ ہوگئے جب کہ شان مسعود بھی 40 رنز کی اننگز کھیل کر پویلین واپس لوٹ گئے۔

حارث سہیل اور عمر اکمل نے 98 رنز کی پارٹنرشپ قائم کی اس دوران حارث سہیل نے اپنی نصف سنچری مکمل کی تاہم عمر اکمل ایک رنز کی کمی سے اپنی نصف سنچری مکمل نہ کرسکے اور 49 رنز پر آؤٹ ہوگئے، کپتان شعیب ملک صرف 11 رنز کے مہمان ثابت ہوئے، فہیم اشرف نے 4 چوکوں کی مدد سے 28 رنز بنائے جب کہ عماد وسیم نے جارحانہ بیٹنگ کرتے ہوئے 13 گیندوں پر 23 رنز بنائے، ان کی اننگز میں 4 چوکے اور ایک چھکا شامل تھا۔

آسٹریلیا کی جانب سے کوٹرنائل اور میکسویل نے 2،2 اور نیتھن لائن نے ایک وکٹ حاصل کی۔

میچ سے قبل سانحہ کرائسٹ چرچ کے شہدا کے لیے ایک منٹ کی خاموشی بھی اختیار کی گئی اور تمام کھلاڑیوں کالی پٹیاں باندھ کر میچ میں شریک ہوئے۔