ورلڈچیمپئن شپ آف لیجنڈز: آسٹریلیا، بھارت کوہراکر سیمی فائنل میں پہنچ گیا

ورلڈ چمپئین شپ آف لیجینڈز کے مقابلے میں آسٹریلیا نے بھارت کودھول چٹادی، کینگروز نے بھارتی سورمائوں کو 26 رنز سے شکست دے کر سیمی فائنل کے لیے کوالیفائی کرلیا۔  
ایجبسٹن کرکٹ گراؤنڈ میں کھیلے گئے میچ میں آسٹریلیا چیمپئینز کی ٹیم نے بھارت کیخلاف پہلے بیٹنگ کرتے ہوئے مقررہ 20 اوورز میں 5 وکٹوں کے نقصان پر 199 رنز بنائے، شان مارش 41 رنز بناکر نمایاں رہے جبکہ لوئر مڈل آرڈر میں ڈینیل کرسچن نے 33 گیندوں پر 69 رنز کی زبردست اننگز کھیلی جس میں 7 چھکے اور 3 چوکے شامل تھے۔ 
ان کے علاوہ دیگر کھلاڑیوں میں بین ڈنک نے 17، لوکی فرگوسن نے 26 اور بین کٹنگ 24 رنز بناکر نمایاں رہے۔  
کینگروزکی جانب سے دیئے گئے ہدف کے تعاقب میں بھارتی ٹیم کا آغاز اچھا نہ رہا، اوپنر روبن اتھاپا 12 اور عرفان پٹھان 9 رنز بناکر پویلین لوٹ گئے، مڈل آرڈر میں یوسف پٹھان نے 78 رنز کی مزاحمتی اننگز کھیلی تاہم وہ بھی ٹیم کو کامیابی دلوانے میں ناکام رہے کیونکہ انہیں دوسرے اینڈ سے سپورٹ نہیں ملی اور بھارتی ٹیم کی وکٹیں یکے بعد دیگرے گرتی رہیں۔ 
بھارت کے دیگر بلے بازوں میں سریش رائنا 12، کپتان یورواج سنگھ 19، پون نیگی 11 رنز بناپائے جبکہ ہربھجن سنگھ 4 رنز بناکر ناٹ آؤٹ رہے۔  
آسٹریلیا کی جانب سے پیٹر سڈل اور نتھین کوالٹرنائل نے 2، 2 وکٹیں حاصل کیں۔ 
واضح رہے کہ پاکستان اور آسٹریلیا کی ٹیمیں ایونٹ کے سیمی فائنل تک رسائی حاصل کرچکی ہیں جبکہ بھارت، انگلینڈ اور ویسٹ انڈیز کے درمیان تیسری اور چوتھی پوزیشن کے لئے مقابلہ جاری ہے۔  
قومی لیجنڈزپر مشتمل پاکستانی کرکٹ ٹیم ایونٹ میں 4 میچز میں 4 فتوحات کے ساتھ ناقابل شکست ہے۔