ٹی20 ورلڈکپ: آسٹریلیا نے نمیبیا کو 9 وکٹوں سے شکست دے دی

آئی سی سی ٹی 20 ورلڈ کپ 2024 میں آسٹریلیا نے نمیبیا کو 9 وکٹوں سے شکست دے دی۔ اسپنر ایڈم زمپا اسٹینڈ آؤٹ کھلاڑی تھے جنہوں نے چار وکٹیں لے کر تاریخ رقم کی اور نمیبیا کو 17 اوورز میں میدان بدر کرنے میں مدد کی۔  
نمیبیا کے 72 رنز کے آسان ہدف کو آسٹریلیا نے 1 وکٹ کے نقصان پر 5.4 اوورز میں حاصل کر کے سپر 8 مرحلے کے لیے کوالیفائی کر لیا ہے۔ 
آسٹریلیا کے ٹریوس ہیڈ نمایاں بیٹسمین تھے جنہوں نے 34 رنز کی ناقابل شکست اننگز کھیلی، ڈیوڈ وارنر 20 رنز بنا کر آؤٹ ہوئے، جبکہ مچل مارش 18 رنز پر ناٹ آؤٹ رہے۔ 
آسٹریلیا کی واحد وکٹ نمیبیا کے بولر ڈیوڈ ویزے نے حاصل کی۔ 
اس سے قبل سر ویوین رچرڈز اسٹیڈیم میں میگا ایونٹ کے گروپ بی کے میچ میں آسٹریلیا نے ٹاس جیت کر نمیبیا کو پہلے بیٹنگ کی دعوت دی۔نمیبیا کی بیٹنگ لائن آسٹریلوی بولرز کے سامنے ریت کی دیوار ثابت ہوئی اور پوری ٹیم 17 اوورز میں 72 رنز پر آؤٹ ہوگئی۔ نمیبیا کے 9 بیٹسمین ڈبل فیگرز میں بھی داخل نہ ہو سکے، ٹیم کے کپتان گیرہارڈ ایراسمس 36 رنز بنا کر نمایاں رہے جبکہ مائیکل وین نے 10 رنزبنائے۔ 
کینگرو بولر ایڈم زمپا نے شاندار کارکردگی کا مظاہرہ کرتے ہوئے 4 کھلاڑیوں کو آؤٹ کیا، مارکوس اسٹوئنس اور جوش ہیزل ووڈ نے 2،2 جبکہ کپتان پیٹ کمنز اور ناتھن ایلیز نے ایک، ایک وکٹ حاصل کی۔  
اس سے قبل کینگروز کی ٹیم اپنے دونوں میچوں میں کامیابی سمیٹ چکی ہے جس سے اس کی سپر ایٹ میں جگہ پکی ہوگئی ہے جبکہ نمیبیا کو گزشتہ دو میچوں میں سے ایک میں کامیابی حاصل ہوئی اور ایک میں ناکامی کا سامنا کرنا پڑا ۔