نیوزی لینڈ کیخلاف تیسرے میچ میں 27 رنز سے کامیابی، سیریز میں بھی کلین سوئپ۔
٢٦ فروری ٢٠٢٤
آسٹریلیا نے کیویز کیخلاف ٹوئنٹی 20 سیریز میں کلین سوئپ مکمل کرلیا جب کہ آسٹریلیا نے 100 ویں ٹی 20 انٹرنیشنل میں کامیابی بھی اپنے نام کرلی۔
نیوزی لینڈ کے خلاف سیریز کے تیسرے ٹی 20 میچ میں آسٹریلیا نے پہلے کھیل کر 10.4 اوورز میں 4 وکٹوں کے نقصان پر 118 رنز جوڑے، اسٹیون اسمتھ ایک بار پھر ناکام رہے، وہ محض 4 رنز بناکر میلین کی گیند پر سیفرٹ کا کیچ بن گئے، تاہم میتھیو شارٹ اور اوپنر ٹریوس ہیڈ (27) نے دوسری وکٹ کے لیے 51 رنز کی شراکت داری بناکر ٹوٹل کو 67 تک پہنچادیا، گلین میکسویل 20 رنز بناکر پویلین واپس لوٹ گئے۔
آسٹریلیا کی چوتھی وکٹ ٹریوس ہیڈ کی صورت میں گری، وہ 5 چوکوں اور ایک چھکے کی مدد سے 30 بالز پر 33 رنز بناکر پویلین رخصت ہوئے، جوش انگلس 14 جبکہ ٹم ڈیوڈ 8 رنز پر ناٹ آئوٹ رہے، ایڈم ملن، بین سیئرز، مچل سینٹنر اور جوش کلارکسن نے ایک، ایک وکٹ لی، 10 اوورز میں 126 رنز کا ہدف پانے والے کیویز 3 وکٹیں کھوکر 98 بنا پائے۔
اوپنر فن ایلن 9 بالز پر 13 رنز بناکر زیمپا کا شکار بنے، ول ینگ کی کاوش 14 کے اسکور پر شارٹ نے تمام کردی، اس بار کیچ زیمپا نے تھاما، ٹم سیفرٹ 2 رنز تک محدود رہے، گلین فلپس نے 24 بالز پر 40 رنز بناکر ناٹ آئوٹ رہے، ان کی اننگز میں 5 چوکے اور 2 سکسر شامل رہے، مارک چیپمین نے 17 رنز ناٹ آئوٹ بنائے، میتھیوشارٹ، اسپنسر جونسن اور ایڈیم زیمپا نے ایک ایک پلیئر کو پویلین کی راہ دکھائی۔
