بابراعظم اور شاہد آفریدی کی اسنوکر کھیلتے ہوئے ویڈیو وائرل

دورہ سری لنکا: تربیتی کیمپ میں شریک کرکٹرز سابق کپتان شاہد آفریدی کے گھر پہنچ گئے

دورہ سری لنکا کی تیاریوں میں مصروف پاکستان کرکٹ ٹیم کے کھلاڑیوں نے کراچی میں سابق ٹیسٹ کپتان شاہد آفریدی کے گھر کا رخ کرلیا۔

قومی تربیتی کیمپ میں شریک کھلاڑیوں نے گزشتہ شب کراچی میں سابق کپتان اور چیف سلیکٹر شاہد آفریدی کے گھر کا رخ کیا اور مہمان خانے میں ان کے ساتھ گپ شپ کرنے کے ساتھ ان کی بڑی صاحبزادی کی رخصتی کی مبارکباد پیش کی۔

اس موقع پر قومی ٹیم کے کپتان بابراعظم اور شاہد آفریدی اسنوکر کھیلتے ہوئے بھی دکھائی دیئے، جس میں سابق اسٹار کرکٹر نے موجودہ قومی ٹیم کے کپتان کو شکست دی۔

قومی کھلاڑیوں میں سابق ٹیسٹ کپتان سرفراز احمد، شاہین شاہ آفریدی اور امام الحق سمیت دیگر کرکٹرز نے لالا کے ساتھ وقت گزارا جبکہ آفریدی نے بابراعظم کو حج کی مبارکباد کے ساتھ دورہ سری لنکا کے لیے نیک خواہشات کا بھی اظہار کیا۔