ایشیاءکپ: بابراعظم نے تیزترین سینچریوں میں ہاشم آملہ کا ریکارڈ توڑدیا

قومی ٹیم کے کپتان بابراعظم نے کم اننگز میں سب سے زیادہ سنچریاں بنانے کا جنوبی افریقی بیٹر ہاشم آملہ کا ریکارڈ توڑ دیا۔ 
ملتان میں کھیلے گئے ایشیاءکپ 2023 کے افتتاحی میچ میں قومی ٹیم کے کپتان بابراعظم نے اپنی ون ڈے کیریئر کی 19 ویں اور ٹوٹل 31 ویں انٹرنیشنل سنچری بنائی، بابراعظم نے 131 گیندوں پر 151 رنز کی شاندار اننگز کھیلی جو نہ صرف ان کا ون ڈے کرکٹ کا دوسرا سب سے بڑا اسکور تھا بلکہ ایشیاءکپ کی تاریخ میں انفرادی بلے باز کا دوسرا سب سے بڑا اسکور بھی تھا۔ 
بھارت کے ویرات کوہلی ایشیاءکپ میں 183 رنز کے ساتھ سب سے زیادہ انفرادی اسکور کرنے والے کھلاڑی ہیں جو انہوں نے 2012 میں پاکستان کے خلاف بنائے تھے۔ 
بابراعظم نے 19 ویں سنچری اپنے ون ڈے کیریئر کی 102 ویں اننگز میں بنائی ہے جبکہ جنوبی افریقہ کے مایہ ناز بلے باز ہاشم آملہ نے اپنی 19 ویں سنچری اننگز نمبر 104 میں بنائی تھی۔ 
افتخار احمد نے بھی میچ کے دوران اپنے او ڈی آئی کیریئر کی پہلی سنچری بنائی۔ 71 گیندوں پر 109 رنز ناٹ آؤٹ کے ساتھ ون ڈے کرکٹ میں یہ ان کا سب سے بڑا اسکور تھا۔ 
واضح رہے کہ بابراعظم ون ڈے میں پاکستان کے سب سے زیادہ 19 سنچریاں بنانے والے دوسرے کھلاڑی ہیں۔ ان سے پہلے لیجنڈ کرکٹر سعید انور 20 سنچریوں کے ساتھ پہلے نمبر پر ہیں تاہم انہوں نے یہ سنچریاں 244 اننگز کھیل کر بنائی تھیں اور بابراعظم نے ابھی صرف 102 اننگز کھیلی ہیں۔ 
نیپال کے خلاف میچ میں بابراعظم اور افتخار احمد نے 131 گیندوں پر 214 رنز کی پارٹنرشپ قائم کی جو ون ڈے کرکٹ میں پاکستان کے لیے پانچویں وکٹ کا سب سے بڑا اسٹینڈ ہے۔ 
اس سے پہلے پانچویں وکٹ پر بہترین شراکت عمر اکمل اور یونس خان کے درمیان 2009 میں سری لنکا کے خلاف 176 رنز کی تھی۔