ایک اور اہم اعزاز بابر اعظم کا منتظر

قومی ٹیم کے کپتان اور مایہ ناز بلے باز بابراعظم آج ٹی ٹوئنٹی میچز کی اپنی سنچری مکمل کریں گے، وہ آج قذافی اسٹیڈیم میں نیوزی لینڈ کے خلاف میچ میں ٹاس کریں گے تو 100 ٹی ٹوئنٹی میچ کھیلنے کا اعزاز پانے والے تیسرے پاکستانی بن جائیں گے۔

ان سے پہلے شعیب ملک 123 اور محمد حفیظ 119 ٹی ٹوئنٹی میچز میں ملک کی نمائندگی کرچکےہیں۔

دائیں ہاتھ کے منفرد انداز کے بیٹر بابرعظم اب تک ننانوے ٹی ٹوئنٹی میچز میں تین ہزار تین سو پچپن رنز بناچکے ہیں۔ جس میں دو زبردست سنچریاں بھی شامل ہیں۔

گزشتہ روز لاہور میں سیریز کی ٹرافی کی رونمائی میں پاکستانی ٹیم کے کپتان بابر اعظم اور نیوزی لیںڈ کے کپتان ٹام لیتھم نے شرکت کی۔ اس موقع پر میڈیا سے بات چیت کرتے ہوئے کپتان بابر اعظم کا کہنا تھا کہ سیریز کے لیے بھرپور تیاری کی ہے۔ 

اس سوال پر کہ کیا نیوزی لینڈ کے خلاف ٹی ٹوئنٹی سیریز میں اوپننگ جوڑی کے ساتھ تجربہ کرنے کا کوئی منصوبہ ہے؟

جس پر انہوں نے واضح کیا کہ فی الحال ایسا کوئی منصوبہ نہیں ہے اور ٹیم محمد رضوان کے ساتھ اوپننگ جوڑی کے طور پر شراکت داری جاری رکھے گی۔ ہماری اپنی اوپننگ جوڑی کے ساتھ فی الحال کوئی نیا تجربہ کرنے کا ارادہ نہیں ہے۔ ہم رضوان کے ساتھ اپنی ابتدائی شراکت کو جاری رکھیں گے۔