بابراعظم کا یو اے ای لیگ سے 15 کروڑ کا معاہدہ نہ ہوسکا

قومی ٹیم کے کپتان بابراعظم کا امارات لیگ سے15 کروڑ کا معاہدہ نہ ہو سکا،انھیں لیگ کا سفیر بھی بنایا جا رہا تھا۔ 
تفصیلات کے مطابق آئی ایل ٹی ٹوئنٹی کا دوسرا ایڈیشن19جنوری سے 18 فروری تک منعقد ہوگا، گذشتہ برس ایونٹ میں کسی پاکستانی کرکٹر کو شرکت کی اجازت نہیں دی گئی تھی، البتہ اس بار شاہین شاہ آفریدی، شاداب خان اور اعظم خان ڈیزرٹ وائپرز کی جانب سے ایکشن میں نظر آئیں گے۔ 
ذرائع نے بتایا کہ کپتان بابراعظم کو بھی 15 کروڑ روپے کے معاہدے کی پیشکش ہوئی،انھیں لیگ کا سفیر بھی بنایا جا رہا تھا، معاملات خاصی حد تک طے بھی ہو گئے تھے مگر پھر ادائیگی کی شرائط اور امیج رائٹس پر بات نہ بن سکی، بنگلہ دیش پریمیئر لیگ کا ممکنہ طور پر 10 جنوری کو آغاز ہوگا، بابر اعظم اور محمد رضوان سمیت کئی پاکستانی کرکٹرز فراغت کے دنوں میں اس لیگ میں حصہ لیں گے۔ 
ذرائع نے مزید بتایا کہ شاہین شاہ آفریدی نے آئی ایل ٹی ٹوئٹی سے سالانہ 4 لاکھ ڈالر کے عوض معاہدہ کیا ہے، انھیں امیج رائٹس کی مد میں مزید رقم بھی دی جائے گی، یوں وہ بھی تقریبا15 کروڑ روپے ہر سال حاصل کر سکیں گے،ان کے معاہدے میں یہ بات شامل ہے کہ تینوں سال تک وہ سب سے زیادہ معاوضہ حاصل کرنے والے کھلاڑی ہوں گے،اگر تیسرے ایڈیشن میں زیادہ رقم پر کوئی اور کھلاڑی آیا تو شاہین کے معاوضے میں بھی خود بخود اضافہ ہوجائے گا۔ 
یاد رہے کہ ہر لیگ میں پلیئر کو ایک مخصوص حد تک ہی فیس دی جاتی ہے،البتہ اگر کوئی بڑا اسٹار آجائے تو امیج رائٹس کی مد میں اس کا معاوضہ بڑھا دیتے ہیں، اس صورت میں اسے کوئی ٹویٹ کرنے، لیگ کی پروموشن، فوٹو شوٹ یا کسی ایونٹ میں شریک ہونے کا کہا جا سکتا ہے، اس کا الگ معاہدہ ہوتا ہے۔