لاہور: قومی کرکٹ ٹیم کے سابق فاسٹ بولر شعیب اختر نے ٹی20 ورلڈکپ کے گروپ میچ میں زمبابوے کے خلاف شکست پر شدید مایوسی کا اظہار کیا ہے۔
٢٨ اکتوبر ٢٠٢٢
سابق اسپیڈ اسٹار نے اپنے یوٹیوب پر جاری ویڈیو میں قومی ٹیم کے کپتان اور سلیکشن کو تنقید کا نشانہ بناتے ہوئے کہا کہ بابراعظم ایک برے کپتان ہیں، میں یہ پہلے بھی کہہ چکا ہوں اور میں دوبارہ کہہ رہا ہوں ایوریج پلئیرز کے ساتھ ایوریج نتیجہ ہی نکلتا ہے جو نظر آرہا ہے۔
شعیب اختر نے کہا کہ آج کے میچ کے بعد میں بہت زیادہ اداس ہوں، آپ لوگ زمبابوے سے بھی ہار گئے ہیں۔ دنیا بھر کا میڈیا ہمیں دیکھنا پڑتا ہے، کتنی بار کہہ کہہ کر تھک گیا کہ بابراعظم اوپننگ کے بجائے ون ڈاؤن آئے لیکن سمجھ ہی نہیں آتی۔ اوپننگ میں جارحانہ کھیل پیش کرنے والے بلےبازوں کی ضرورت ہوتی ہے۔
انہوں نے کہا کہ اب آپ سوچیں گے کہ ایسا ہوجائے ویسا ہوجائے، اب آپ سیمی فائنل میں کوالیفائی بھی بہت مشکل سے کریں گے۔ شعیب اختر نے کہا کہ چیئرمین پی سی بی کہہ رہے تھے کہ ٹیم کو سپورٹ کریں، ہم کررہے ہیں لیکن کس برانڈ کی کرکٹ کھیلی جارہی ہے؟۔
ان کا کہنا تھا کہ اس طرح نہیں ہوسکتا منہ اٹھایا اور چلے گئے، وہ آپ کے لیے سہرے لے کر کھڑے ہوں گے کہ میچ پکڑا دیں گے، آپ زمبابوے سے ہار گئے یہ بات آپ کو سمجھ نہیں آرہی، مینجمنٹ سے لے کر چیئرمین پی سی بی تک سب نل بٹا نل ہیں، عقل ہی نہیں کسے سلیکٹ کرنا ہے کسے لے کر جانا ہے۔
سابق فاسٹ بولر کا کہنا تھا کہ ’کھلانا چار بولر کو ہے اور کھلا تین فاسٹ بولر کو رہے ہیں، میں نے کہا تھا دو کام کے بندے اوپنر لے جائیں، فخر زمان وہاں بہترین کام کرتا لیکن اسے استعمال نہیں کیاگیا، یہ ہمارے لیے بہت شرمندگی کا باعث ہے۔
انہوں نے مزید کہا کہ ’ہمیں میڈیا کو فیس کرنا ہوتا ہے، ہمیں بھارت اور دوسری دنیا کو بیٹھ کر جواب دینا پڑتا ہے اب اس پرفارمنس پر کیا جواب دیں گے، یہ انتہائی شرمناک ہے، اب کیا رہ گیا، اب وہ اس سے ہارے یہ اس سے ہارے تو ہم پہنچ سکتے ہیں، ہم پہلی پوزیشن پر کیوں نہیں‘۔
سابق کرکٹر نے کہا کہ ’بھارت کو جیتا ہوا میچ پلیٹ میں رکھ کر دے دیا، بابر نے کیوں کیلکولیشن نہیں کی، کیوں مینجمنٹ نے کوشش نہیں کی، آخری اوور کرانا نواز کی جاب نہیں، میں بہت مایوس ہوں، پہلے ہی کہا تھا پاکستانی ٹیم اس ہفتے واپس آئے گی، مجھے بہت غصہ ہے، کوئی پلاننگ نہیں ہے، مجھے اس ٹیم پر کوئی بھروسہ نہیں، آپ کا اللہ حافظ ہے۔
واضح رہے کہ پاکستان ٹی 20 ورلڈ کپ کے سپر 12 مرحلے میں اپنا اگلا میچ اتوار کو ہالینڈ سے کھیلے گا تاہم اس میچ میں شکست کے ساتھ ہی قومی ٹیم کی ورلڈکپ مہم بھی اختتام پذیر ہوجائے گی۔
.jpg)
