ایمرجنگ ویمنز ایشیا کپ: سیمی فائنل میں بنگلہ دیش نے پاکستان کو ہرادیا

ایمرجنگ ویمنز ایشیا کپ میں بنگلہ دیش اے نے سیمی فائنل میں پاکستان اے کو 6 رنز سے شکست دے دی۔

بارش اور خراب موسم کی وجہ سے پاکستان ایمرجنگ اور بنگلا دیش کے درمیان کھیلے گئے سیمی فائنل کو 9 اوورز تک محدود کردیا گیا تھا۔ 

بنگلہ دیش کی ٹیم نے ٹاس جیت کر پہلے بیٹنگ کا فیصلہ کیا اور مقررہ 9 اوورز میں 7 وکٹوں کے نقصان پر59 رنز بنائے۔ ایک موقع پر بنگلہ دیش کی 6 وکٹیں صرف 16 رنز پر گرچکی تھیں لیکن پھر ناہیدہ اختر اور ربیعہ خان نے ساتویں وکٹ کی شراکت میں قیمتی 37 رنز کا اضافہ کیا، ناہیدہ اختر نے 21 رنز اسکور کیے، پاکستانی بولرفاطمہ ثنا نے 3 وکٹیں اور انوشے ناصر نے 2 کھلاڑیوں کو آؤٹ کیا۔

پاکستان ایمرجنگ کی اننگز میں ایمان فاطمہ اور شوال ذوالفقار نے 4 اوورز میں 26 رنز کا آغاز فراہم کیا لیکن پھر پاکستان ایمرجنگ کی چار وکٹیں 21 رنز کے اضافے کے ساتھ ہی گرگئیں، شوال ذوالفقار نے 11 رنز بنائے جبکہ پاکستانی ٹیم مقررہ 9 اوور میں صرف 53 رنز ہی بنا سکی اور یوں ایمرجنگ ویمنز ایشیا کپ  کے سیمی  فائنل میں بنگلا دیش نے پاکستان کو 6 رنز سے شکست دے دی۔

پاکستانی ٹیم کی جانب سے 60 رنز کا آسان ہدف حاصل نہ کرپانے کے بعد اب فائنل بنگلہ دیش اے اور بھارت اے کے درمیان کھیلا جائے گا۔واضح رہے کہ بھارت اے اور سری لنکا کے درمیان پہلا سیمی فائنل گیلی آؤٹ فیلڈ کے سبب ممکن نہ ہوسکا تھا، مگر بھارت اے نے چونکہ اپنے گروپ میں پہلی پوزیشن حاصل کی تھی لہٰذا اس نے فائنل میں جگہ بنالی۔
بھارت اے اور بنگلہ دیش کا فائنل بدھ کے روز اسی گرائونڈ میں کھیلا جائے گا۔