چیمپیئنزٹرافی 2025: بھارتی ٹیم کے پاکستان آنے کا فیصلہ حکومت کرے گی

چیمپئنز ٹرافی کھیلنے کے لیے بھارتی ٹیم کی پاکستان کی آمد سے متعلق بی سی سی آئی کا اہم بیان سامنے آگیا۔
پاکستان میں آئندہ سال شیڈول چیمپئنز ٹرافی کے لیے بھارتی ٹیم پاکستان آئے گی یا نہیں اس حوالے سے بھارتی کرکٹ بورڈ کے نائب صدر کا اہم بیان سامنے آیا ہے۔ 
بھارتی بورڈ کے نائب صدر راجیو شکلا کا کہنا ہے کہ چیمپئنز ٹرافی کے لیے بھارتی ٹیم کو پاکستان بھیجنا یا نہ بھیجنا حکومت کا اختیار ہے، ہم وہی کریں گے جو ہماری حکومت کہے گی۔،، 
چیمپئنز ٹرافی آئندہ سال جنوری فروری میں پاکستان میں شیڈول ہے۔ جس کے میچز تین مقامات کراچی، لاہور اور راولپنڈی میں ہوں گے۔  
چیمپئنز ٹرافی کے مجوزہ شیڈول میں بھارتی ٹیم کے پاکستان میں کم سے کم سفر کرنے کے حوالے سے تجویز سامنے آئی ہے اور پڑوسی ملک کے تمام میچز لاہور میں کرانے کی تجویز بھی سامنے آچکی ہے۔  
واضح رہے کہ پی سی بی کے سربراہ محسن نقوی پہلے ہی کہہ چکے ہیں کہ چیمپئنز ٹرافی میں بھارتی ٹیم کے پاکستان آکر کھیلنے سے انکار کی کوئی وجہ نہیں ہے، ایونٹ میں شامل تمام ٹیموں کو شیڈول پہلے ہی ارسال کیا جاچکا ہے۔ 
بورڈ آف کنٹرول فار کرکٹ ان انڈیا (بی سی سی آئی) کے نائب صدر راجیو شکلا نے کہا ہے کہ اگلے سال پاکستان میں ہونے والی آئی سی سی چیمپئنز ٹرافی میں ہندوستانی ٹیم کی شرکت حکومت ہند کی منظوری پر منحصر ہے۔ یہ ایونٹ فروری سے مارچ 2025 کے لیے شیڈول ہے، اس بات کے خدشات ہیں کہ بھارت ٹورنامنٹ کے لیے پاکستان کا سفر نہیں کر سکتا اور اپنے میچوں کے لیے غیر جانبدار مقام کا مطالبہ کر سکتا ہے جیسا کہ اس نے گزشتہ سال ایشیا کپ کے ساتھ کیا تھا۔ 
اے این آئی سے بات کرتے ہوئے راجیو شکلا نے کہا کہ "چیمپئن ٹرافی کے معاملے میں، ہم وہ کریں گے جو حکومت ہمیں کرنے کو کہے گی۔ ہم اپنی ٹیم کو تبھی دوسرے ممالک میں بھیجتے ہیں جب حکومت ہمیں اجازت دیتی ہے۔ لہذا ہم بھارتی حکومت کے فیصلے کے مطابق جائیں گے۔  
دوسری جانب ای ایس پی این کرک انفو نے رپورٹ کیا ہے کہ پی سی بی نے کراچی، لاہور اور راولپنڈی کو دو ہفتے کے ایونٹ کے میزبان شہروں کے طور پر فائنل کردیا ہے۔ بھارت کے لیے مجوزہ شیڈول کے مطابق فائنل سمیت ان کے تمام میچ لاہور میں ہوں گے۔ اس  کا مقصد بلیو شرٹس کے سفر سے متعلق ممکنہ چیلنجوں کو کم کرنا اور ہندوستانی شائقین کے لیے آسان رسائی کو یقینی بنانا ہے، خاص طور پر لاہور کی واہگہ بارڈر کراسنگ سے قربت کی وجہ سے بھارتی شائقین یہ میگا ایونٹ دیکھنے کے لیے باآسانی پاکستان آسکتے ہیں۔