بھارتی ڈریسنگ روم میں دیر تک صف ماتم بچھی رہی  

دنیائے کرکٹ کے سب سے بڑے ایونٹ ورلڈکپ 2023 کے فائنل میں شکست کے بعد بھارتی ڈریسنگ روم میں تادیر صف ماتم بچھی رہی۔ 
ورلڈکپ 2023 کے فائنل میں آسٹریلیا کے ہاتھوں شکست کے بعد بھارتی ڈریسنگ روم کی فضاکافی سوگوار قسم کی تھی، تمام کھلاڑی صدمے سے چور تھے جبکہ کچھ کی آنکھوں سے آنسو تک رواں تھے۔ 
کھلاڑیوں کے جذباتی ہونے کا انکشاف خود بھارت کے ہیڈ کوچ راہول ڈریوڈ نے کیا، ان کا کہنا تھا کہ روہت شرما کافی مایوس تھے، ڈریسنگ روم میں دوسرے کھلاڑی کافی جذباتی دکھائی دے رہے تھے، ایک کوچ ہونے کے ناطے ان کو اس طرح دیکھنا میرے لیے بہت ہی مشکل تھا کیونکہ میں سب کو ذاتی طور پر جانتا ہوں اور مجھے معلوم ہے کہ انھوں نے ایک ماہ کے دوران کتنی زیادہ محنت کی اور کس طرح کی کرکٹ کھیلی۔  
یاد رہے کہ بھارتی بلے باز ویرات کوہلی اور لوکیش راہول کی ففٹیز کے باوجود بھارت اسکور بورڈ پر صرف 240 رنز ہی سجاسکا، جواب میں آسٹریلوی اوپنر ٹریوس ہیڈ نے 120 بالز پر 137 رنز کی زنردست اننگز کھیلی اور میچ کو بھارت کی پہنچ سے دور لے گئے۔ ڈریوڈ کہتے ہیں کہ یہ ایک کھیل ہے اور اس میں ایسا ہوتا رہتا ہے، جو بہتر ٹیم تھی وہ جیت گئی، کل نیا سورج نکلے گا، ہم اس شکست سے سیکھیں گے اور آگے بڑھیں گے، آپ کو اسپورٹس میں ناکامیوں اور مایوسیوں کا سامنا کرنا پڑتا ہے مگر آپ آگے بڑھتے رہتے ہیں، رکتے نہیں ہیں، اگرآپ کو ایسی چیزوں کا سامنا نہ کرنا پڑے تو کبھی بھی نہیں سیکھ پائیں گے۔ 
راہول ڈریوڈ اور دوسرے کوچنگ اسٹاف کے بھارتی کرکٹ بورڈ کے ساتھ معاہدے ورلڈکپ 2023 کے اختتام تک تھے، اس حوالے سے جب ان سے سوال کیا گیا تو ڈریوڈ کا کہنا تھا کہ میں بطور کوچ اپنے مستقبل کے بارے میں کچھ بھی نہیں جانتا۔،،