بھارتی امپائر کو فکسنگ کے الزامات میں دھر لیا گیا

بھارتی پنجاب سے تعلق رکھنے والے جتین نامی ایک امپائر کو فکسنگ کے الزامات میں دھر لیا گیا۔

ایک بھارتی امپائر جیتن کیشپ کو آئی سی سی اینٹی کرپشن کوڈ کے تحت 2 الزامات کا سامنا ہے،چارج شیٹ جاری کیے جانے کے بعد انھیں 14دن میں جواب دینا ہوگا۔ ذرائع کے مطابق بھٹننڈا پنجاب سے تعلق رکھنے والے جیتن آفیشل انٹرنیشنل امپائر نہیں ہیں بلکہ مقامی سطح پر ہی میچز سپروائز کرتے ہیں،انھوں نے گذشتہ سال اومان میں ہونے والے ایشیا کپ کوالیفائرز میں کرکٹرز کو کرپشن پر آمادہ کرنے کے لیے کوشش کی، وہ اس ایونٹ میں خود کسی حیثیت میں شریک نہیں تھے مگر بالواسطہ طریقے سے کھلاڑیوں پر اثر انداز ہونے کے لیے کوشاں رہے۔

معاملہ انٹرنیشنل میچز سے متعلق ہونے کی وجہ سے آئی سی سی کے کان کھڑے ہوئے اور تحقیقات کا آغاز کردیا گیا، ابتدائی طور پر الزامات میں جان ہونے کی وجہ سے ان کے خلاف چارج شیٹ جاری کردی گئی۔

جیتن کیشپ کو آئی سی سی کوڈ آف کنڈکٹ کے تحت آرٹیکل 2.4.6اور 2.4.7کی خلاف ورزی کے الزامات کا سامنا ہے، چارج شیٹ کے مطابق ایک تو انھوں نے کھلاڑیوں سے رابطوں میں ان کو کرپشن میں ملوث کرنا چاہا، دوسرے متعلقہ حقائق کو مسخ، تبدیل یا چھپانے کا جرم بھی کیا، ساتھ ہی ساتھ تاخیری حربے بھی استعمال کیے، آئی سی سی کی جانب سے اس اسکینڈل میں ملوث کسی کھلاڑی کا نام تو نہیں لیا گیا مگر آگے چل کر حقائق سامنے آسکتے ہیں۔

 یاد رہے کہ انٹرنیشنل ایونٹس پر عالمی کونسل کی کڑی نظر ہونے کی وجہ سے کرپٹ عناصر کوالیفائرز اور لیگز کو زیادہ ہدف بناتے ہیں، وینیو زیادہ معروف نہ ہونے کی وجہ سے اومان میں میچز کو کرپشن میں ملوث کرنے کے لیے کوشش کی گئی، اس حوالے سے مزید حقائق بھی جلد سامنے آنے کی توقع ہے۔