لنکن لیگ:کون کون سے پاکستانی کھلاڑیوں نےنیلامی کےلئے رجسٹریشن کروائی؟

لنکن پریمئیر لیگ (ایل پی ایل) میں شرکت کرنے والی ہر ٹیم مجموعی طور پر 20 کھلاڑیوں پر مشتمل ہوگی جس میں سری لنکا کے 14 کھلاڑی اور 6 غیر ملکی کھلاڑی شامل ہوں گے۔ راؤنڈ رابن مرحلے کے دوران تمام ٹیمیں دو بار آمنے سامنے ہوں گی اور 4 ٹیمیں پلے آف مرحلے میں کھیلیں گی۔

ٹورنامنٹ کے لیے مقامی اور غیرملکی کھلاڑیوں کی نیلامی 14 جون کو ہوگی جبکہ ٹورنامنٹ 30 جولائی سے 22 اگست 2023 تک جاری رہے گا۔

سری لنکا کرکٹ نے تصدیق کی ہے کہ تقریباً 500 سے زائد کھلاڑیوں نے نیلامی کے لئے رجسٹریشن کروائی ہے۔  ہر فرنچائز کھلاڑیوں کی بولی کے لئے 5 لاکھ امریکی ڈالر رقم ادا کرے گی۔

جن پاکستانی کھلاڑیوں کی جانب سے لنکن پریمئیر لیگ میں رجسٹریشن کروائی گئی ہے ان میں شعیب ملک، عماد وسیم، وہاب ریاض، اعظم خان، محمد حسنین، افتخار احمد، امام الحق، زمان خان، عمر بن یوسف، میر حمزہ، عبداللہ شفیق اور صہیب مقصود کے ساتھ ساتھ عامر جمال، فواد عالم، محمد نواز، وسیم جونیئر، شرجیل خان، قاسم اکرم، محمد عرفان، سہیل خان، انور علی، صائم ایوب، حارث سہیل، یاسر شاہ، عثمان قادر، رومان رئیس، شاہنواز دھانی، عمر اکمل، محمد حفیظ، حیدر علی، آصف علی، عثمان شنواری، سرفراز احمد، محمد حارث اور فہیم اشرف شامل ہیں جبکہ کپتان بابر اعظم پہلے ہی کولمبر اسٹرائیکرز کا حصہ بن چکے ہیں۔

لنکن لیگ کے آغاز سے قبل پانچوں ٹیموں نے اپنے اپنے اسکواڈ کے لئے کچھ کھلاڑیوں کو پہلے سے سائن کرلیا تھا جن کی فہرست ذیل میں درج ہے۔

• کولمبو اسٹرائیکرز میں بابراعظم، متھیشا پتھیرانا، نسیم شاہ، چمیکا کرونارتنے شامل ہیں۔

• دمبولا اورا میں میتھیوز ویڈ، کوسل مینڈس، لونگی نگیڈی، اویشکا فرنینڈو شامل ہیں۔

• جافنا کنگز میں ڈیوڈ ملر، تھیسارا پریرا، رحمان اللہ گرباز، مہیش تھیکشنا شامل ہیں۔

• کینڈی فالکنز میں مجیب الرحمان، ونیندو ہسرنگا، فخر زمان، اینجلو میتھیوز شامل ہیں۔

• گال گلیڈی ایٹرز میں شکیب الحسن، داسن شاناکا، تبریز شمسی اور بھانوکا راجا پاکسے شامل ہیں۔