ورلڈکپ: بھارت میں کھیلنے کا فیصلہ حکومتی کمیٹی کرے گی

ورلڈکپ میں قومی ٹیم کی شرکت کا حتمی فیصلہ کرنے کے لیے وزیراعظم نے ہائی پروفائل کمیٹی قائم کی ہے جس کی سربراہی وزیر خارجہ بلاول بھٹو زرداری کے سپرد کی گئی ہے۔
کمیٹی میگا ایونٹ میں پاکستان کی شمولیت پر غور کرے گی اور خاص طور پر احمد آباد میں پاکستان بمقابلہ بھارت کے متوقع میچ کے مقام کے طور پر سیکورٹی انتظامات کا جائزہ لے گی۔ 
پاکستان کرکٹ بورڈ (پی سی بی) کی مینجمنٹ کمیٹی کے سربراہ ذکا اشرف کا کہنا ہے کہ ورلڈکپ میں شرکت کے حوالے سے بھارت کے موجودہ حالات کو دیکھتے ہوئے حکومت ہدایات دے گی۔ 
ایکسپریس نیوز کو خصوصی انٹرویو دیتے ہوئے چیئرمین پی سی بی ذکا اشرف نے کہا کہ ورلڈکپ میں شرکت کے حوالے سے آئی سی سی نے ہم سے پوچھا تھا، بورڈ نے معاملہ حکومت کو ریفر کرتے ہوئے وزیراعظم اور پیٹرن شہباز شریف کو خط لکھا تھا تاہم انہوں نے ایک اعلیٰ سطح کی کمیٹی تشکیل دی تھی۔
انہوں نے کہا کہ بھارت کے حالات کو دیکھتے ہوئے حکومت ہدایت دے گی، وینیوز کے بارے میں بھی حکومت بہتر فیصلہ کرسکتی ہے کہ کہاں جانا ہے اور کہاں نہیں جانا چاہیے۔ 
بھارت میں ٹیم کی سیکورٹی کے انتظامات کا جائزہ لینے کے لیے وفد بھجوانے کا فیصلہ کمیٹی کو کرنا ہے ہم صرف ان کی ہدایت پر عمل درآمد کریں گے۔ 
واضح رہے کہ میگا ایونٹ کا آغاز 5 اکتوبر سے ہوگا، پاکستان ورلڈکپ میں اپنے سفر کا آغاز 6 اکتوبر کو حیدر آباد میں نیدرلینڈز کے خلاف میچ سے کرے گا۔
شیڈول کے مطابق 12 اکتوبر کو پاکستان کا سامنا سری لنکا سے ہوگا جبکہ روایتی حریف پاکستان اور بھارت کے درمیان مقابلہ 15 اکتوبر کو احمد آباد کے نریندر مودی کرکٹ اسٹیڈیم میں ہونا ہے، تاہم میچ 14 اکتوبر کو ری شیڈول کیا جاسکتا ہے۔
پاکستان اور آسٹریلیا کے درمیان میچ 20 اکتوبر کو بنگلورو میں رکھا گیا ہے، 23 اکتوبر کو پاکستان اور افغانستان کی ٹیمیں چنائی میں آمنے سامنے ہوں گی۔ قومی ٹیم 27 اکتوبر کو جنوبی افریقہ جبکہ 31 اکتوبر کو بنگلہ دیش کے مدمقابل آئے گی۔ 
گرین شرٹس کا 5 نومبر کو بنگلورو میں نیوزی لینڈ کی ٹیم کے ساتھ جوڑ پڑے گا جبکہ 12 نومبر کو قومی ٹیم انگلینڈ کے خلاف کولکتہ میں میدان میں اُترے گی۔
ورلڈکپ کا پہلا سیمی فائنل ممبئی اور دوسرا کولکتہ میں ہوگا، فائنل 19 نومبر کو احمد آباد کے نریندر مودی اسٹیڈیم میں کھیلا جائے گا۔