بورڈ میں پروفیشنل لوگ لائیں، عامرسہیل کا ذکا اشرف کو مشورہ

قومی ٹیم کے سابق کپتان عامر سہیل نے پی سی بی مینجمنٹ کمیٹی کے سربراہ ذکا اشرف کے لیے نیک خواہشات کا اظہار کرتے ہوئے بورڈ میں پروفیشنل لوگ لانے کا مشورہ دیا ہے۔

ایکسپریس نیوز سے بات چیت کرتے ہوئے عامر سہیل کا کہنا تھا کہ ذکا اشرف ایک تجربہ کار شخص ہیں اور کرکٹ کی بہت سوجھ بوجھ رکھتے ہیں، ان کے آنے سے پاکستان کرکٹ درست سمت میں گامزن ہوگی۔ پروفیشنل اور تجربہ کار لوگوں کو بورڈ سیٹ اَپ کا حصہ ہونا چاہیے۔

انہوں نے کہا کہ جلد بازی میں کسی بھی قسم کے فیصلوں سے گریز کیا جائے تو زیادہ مناسب ہوگا۔ کرکٹ کو ٹھیک کرنے کے لیے ایسے اقدامات اٹھانے کی ضرورت ہے جس سے مستقبل میں بھی فائدہ ہو۔

 ٹیم ڈائریکٹر مکی آرتھر سمیت غیرملکی کوچنگ سیٹ اَپ کے مستقبل کے بارے میں پوچھے گئے سوال پر سابق کپتان نے موقف اختیار کیا کہ سری لنکا کے خلاف سیریز اور ایشیا کپ سر پر ہے، اس وقت کوئی فوری تبدیلی موزوں نہیں لگ رہی۔ دورہ سری لنکا اور ایشیا کپ کے نتائج دیکھ کر ورلڈکپ کے بارے میں سوچنا پڑے گا۔

انہوں نے کہا کہ ابھی ورلڈکپ دور ہے، پہلے ان میچز کے نتائج دیکھنا پڑیں گے کہ پاکستنانی ٹیم اس کوچنگ سیٹ اَپ میں کیا پرفارم کرتی ہے۔ نتائج دیکھ کر ہی ان کے مستقبل پر بات ہوسکے گی۔

عامرسہیل نے ایک بارپھر واضح کیا کہ وہ پی سی بی میں کسی عہدے کے خواہش مند نہیں ہیں، بطور مبصر انہوں نے جو کمٹمنٹس پہلے سے کررکھی ہیں، ان کو پوراکریں گے۔