بریٹ لی کو عمران ملک میں وقار کی جھلک نظر آنے لگی

برسبین: آسٹریلوی پیسر بریٹ لی نے نوجوان بھارتی پیسر عمران ملک کا موازنہ وقار یونس سے کردیا۔

پیسر عمران ملک نے حالیہ آئی پی ایل کے 14 میچز میں 20.18 کی اوسط سے 22 وکٹیں اپنے نام کی ہیں، سن رائزرز حیدرآباد سے منسلک 22 سالہ فاسٹ بولر نے 150 کلومیٹر فی گھنٹے کی رفتار سے بولنگ کرکے سب کومتاثر کیا ہے۔

مقبوضہ کشمیر سے تعلق رکھنے والے عمران ملک کو بریٹ لی نے وقاریونس کی طرح کا شاندار بالر قرار دیا ہے، جو اپنے زمانے می ریورس سوئنگ بولنگ سے حریف بیٹنگ لائن کو تہس نہس کرنے کی صلاحیت رکھتے تھے، بریٹ لی نے کہا کہ مجھے عمران ملک کو دیکھ کر ہمیشہ ذہن میں وقار یونس کا نام آتا ہے۔