برطانوی ہائی کمیشن کی انگلینڈ اور پاکستانی کرکٹ ٹیم کے اعزاز میں تقریب

سترہ سال بعد انگلینڈ کرکٹ ٹیم کے دورۂ پاکستان پر برطانوی ہائی کمشنر کی جانب سے دونوں ٹیموں کے اعزاز میں تقریب کا انعقاد کیا گیا۔

اسلام آباد میں ہونے والی اس یادگار تقریب کے موقع پر میڈیا سے بات چیت کرتے ہوئے برطانوی ہائی کمشنر کرسچن ٹرنر نے کہا کہ پاکستان کے لیے شاہین شاہ آفریدی کی عدم دستیابی نقصان دہ ہوگی، بابر اعظم اور محمد رضوان بہت اچھا کھیلتے ہیں۔

انہوں نے کہا کہ جلد برطانیہ کی ویمن کرکٹ ٹیم بھی پاکستان کا دورہ کرے گی۔

اس موقع پر وفاقی وزیر اطلاعات مریم اورنگزیب کا کہنا تھا کہ پاکستان میں ایک انٹرنیشنل ٹیم کا آنا دیگر ٹیموں کے لیے دروازے کھول دیتا ہے۔

مریم اورنگزیب نے کہا کہ بین الاقوامی ٹیموں کا دورہِ پاکستان ہماری کرکٹ کے لیے مفید ثابت ہوتا ہے، کپتان بین اسٹوکس کا شکریہ جنہوں نے سیلاب زدگان کے لیے فیس عطیہ کی۔