پاکستان کے خلاف عمدہ کارکردگی پیش کرنا چاہتے ہیں، جوزبٹلر

انگلش کرکٹ ٹیم کے کپتان جوز بٹلر نے کہا ہے کہ بھارت میں جاری ورلڈ کپ 2023 میں خاصی بری کارکردگی دکھانے کے بعد ٹیم نے ’چیزیں بہتر کرنے‘ کی خواہش ظاہر کی ہے اور پوائنٹس ٹیبل پر ٹاپ 8 ٹیموں میں جگہ بنا کر 2025 کی چیمپیئنز ٹرافی کھیلنے کے لیے پرعزم ہے۔
انگلش ٹیم اپنے آخری میچ میں پاکستان کے ساتھ کل 11 نومبر کو کولکتہ کے ایڈن گارڈنز میں مقابلہ کرے گی، پاکستان کے پاس چیمپئنز ٹرافی کی میزبانی کے حقوق ہیں، جس میں 8 ٹیمیں مدمقابل ہوں گی۔ 
انگلش کپتان جوز بٹلر نے صحافیوں کو بتایا کہ ہمیں اس بات کا احساس ہے کہ ہم نے ورلڈ کپ 2023 میں اچھا کھیل پیش نہیں کیا، جو ہم کرنا چاہتے تھے، لیکن ہم مناسب کارکردگی کے ساتھ بھارت سے جانا چاہیں گے۔انہوں نے کہا کہ میرے خیال میں ہر کوئی پریشان ہے، لیکن کھلاڑی سخت محنت کر رہے ہیں، انہوں نے شاید اتنی ہی سخت ٹریننگ کی ہے، جتنی وہ پورے دورے کے دوران کرتے رہے، جو چیزوں کو درست کرنے کی خواہش کے عزم کو ظاہر کرتا ہے۔
جوز بٹلر کا کہنا تھا کہ ہم اس طرح نہیں کھیلے جس طرح کھیلنا چاہتے تھے، لیکن اگلا میچ ہمارے لیے بہت اہم ہے۔انہوں نے کہا کہ یہ بہترین ہے کہ ہم اہم میچ کے لیے وہاں جا رہے ہیں۔،،