چیمپئنز ٹرافی میں شرکت کے لیے ابھی تک بھارت کی جانب سے کوئی مثبت پیغام سامنے نہ آنے کے باوجود پاکستان تاحال کوئی پلان ’’بی‘‘ تیار نہ کر سکا
٢٩ مئی ٢٠٢٤
چیمپئنز ٹرافی 2025 کے انعقاد کے لیے پی سی بی بھارت کی شرکت پر سوالیہ نشان برقرار ہونے کے باوجود اصل منصوبے پر قائم ہے
حکام پر امید ہیں کہ بھارتی کرکٹ ٹیم ٹورنامنٹ میں شرکت کے لیے لاہور آئے گی جبکہ پی سی بی کو یقین ہے کہ بھارتی کرکٹ ٹیم پاکستان آکر اپنے شیڈول میچز کھیلے گی۔
تفصیلات کے مطابق چیمپئنز ٹرافی 2025 کے انعقاد کے لیے پاکستان کرکٹ بورڈ نے ابھی تک کوئی پلان بی تیار نہیں کیا۔ چیمپئنز ٹرافی کا انعقاد آئندہ برس کے اوائل میں ہونا ہے، پاکستان طویل عرصے بعد کسی عالمی ایونٹ کی میزبانی کرے گا، ایونٹ میں بھارتی ٹیم کی شمولیت پر سوالیہ نشان لگے نظر آتے ہیں، بعض حلقے ایشیا کپ کی طرح ہائبرڈ ماڈل اپنانے کی باتیں بھی کرنے لگے، البتہ پی سی بی اپنے موقف پر ڈٹ گیا کہ مقابلوں کا انعقاد صرف پاکستان میں ہی ہوگا، چیئرمین محسن نقوی نے بھی ایک سے زائد بار یہ بات دہرائی ہے۔
ذرائع کے مطابق ایونٹ کے لیے پاکستان نے کوئی پلان بی تیار نہیں کیا، فارمیٹ دیکھتے ہوئے ہائبرڈ ماڈل اپنانا بھی بہت مشکل ہوگا، ایشیا کپ میں بھی یہ طریقہ اتنا کامیاب ثابت نہیں ہوا اور اب تک پی سی بی کا مالی معاملات پر شریک میزبان سری لنکا اور اے سی سی سے تنازع حل نہیں ہوسکا۔
ذرائع نے مزید بتایا کہ یو اے ای سے شریک میزبانی کے حوالے سے پاکستان نے کوئی رابطہ نہیں کیا، حکام کو یقین ہے کہ بھارتی ٹیم اپنے میچز کھیلنے آئے گی۔ مجوزہ شیڈول میں اس کے میچز صرف ایک وینیو لاہور میں ہی رکھے گئے ہیں۔ دوسری جانب کراچی، لاہور اور راولپنڈی میں اسٹیڈیمز کی اپ گریڈیشن دسمبر تک مکمل کرنے کا فیصلہ کیا گیا ہے۔
ڈیزائن کے حوالے سے پی سی بی نے ایک غیرملکی کمپنی کی خدمات حاصل کر لیں، اسے ماضی میں بھی کئی اسٹیڈیمز میں کام کرنے کا اعزاز حاصل ہے، ابتدائی طور پر تیار کردہ ڈیزائن میں بورڈ نے بعض تبدیلیاں کرنے کا کہا ہے، حکام کو یقین ہے کہ تزئین و آرائش کے بعد ملکی وینیوز بالکل تبدیل ہو جائیں گے اور شائقین کو سنسنی خیز کرکٹ دیکھنے کا منفرد تجربہ حاصل ہوگا۔
